მამუკა ბახტაძე - ჩვენ უნდა გაგვიცნოს მსოფლიომ, როგორც ეკოლოგიურად სუფთა პროდუქციის მწარმოებელი ქვეყანა

გპირდებით, რომ ნაბიჯ-ნაბიჯ ჩვენ შევძლებთ და საერთოდ გავაუქმებთ გადასახადებს ყველა იმ მეწარმისთვის, რომელიც საქართველოში იქნება დაკავებული ეკოლოგიურად სუფთა პროდუქციის წარმოებით, - ამის შესახებ პრემიერ-მინისტრმა, მამუკა ბახტაძემ ზუგდიდში განაცხადა, სადაც აგროსაინვესტიციო ბიზნესფორუმი გაიხსნა.

როგორც ბახტაძემ განაცხადა, მან სამეგრელოს სხვადახვა რაიონებში ფერმერებისგან რჩევები მოისმინა და აღნიშნულზე დაყრდნობით, ახალი ინიციატივები გააჟღერა, რომელიც რამდენიმე მიმართულებას ეხება.

„ჩვენ უნდა გაგვიცნოს მსოფლიომ, როგორც ეკოლოგიურად სუფთა პროდუქციის მწარმოებელი ქვეყანა, ეს არის გზა, რომელიც დაგვაძლევინებს სიღარიბეს, ეს არის გზა, რომელიც მოგვცემს საშუალებას, რომ სოფლის მეურნეობის სექტორი საქართველოში განვითარების სულ ახალ დონეზე გადავიყვანოთ. მე ძალიან ბევრი რჩევა მოვისმინე ზუგდიდში, სამეგრელოს სხვა რაიონებში ჩვენი ფერმერებისგან და სწორედ ამ რჩევებზე დაყრდნობით, გუშინ ახალი ინიციატივის შესახებ განვაცხადეთ და ეს ინიციატივები რამდენიმე მიმართულებას ეხება.

პირველი გახლავთ, პროექტი „დანერგე მომავალი“. აქ ჩვენ გავითვალისწინეთ თქვენი რჩევები და მოგეხსენებათ, ზედა ზღვარი ორნახევარჯერ ავწიეთ - ასი ათასი ლარიდან ორასი ათას ლარამდე, რომ თითოეულ თქვენგანს ჰქონდეს იმის შესაძლებლობა, რომ უფრო ფართო მასშტაბით შეხედოს და განავითაროს ეს ბიზნესი. ჩვენ გავითვალისწინეთ თქვენი რჩევები და კენკროვანი პროგრამა უკლებლივ ყველა რაიონს შეეხება. პირადად მე, ძალიან ოპტიმისტურად ვარ განწყობილი, ისევე როგორც თითოეული თქვენთაგანი, როცა საქართველოში კენკროვანი კულტურის განვითარებაზე ვსაუბრობთ. ჩემთვის ძალიან მნიშვნელოვანია, რომ ბოლო წლებში შევძელით და აღვადგინეთ ჩაის წარმოების საკმაოდ მნიშვნელოვანი პოტენციალი. თუმცა, ჯერ კიდევ შორს ვართ იმ ნიშნულიდან, სადაც გვინდა, რომ ვიყოთ. აქედან გამომდინარე, მიღებულია გადაწყვეტილება და ჩვენ კიდევ უფრო მეტად გავზრდით სუბსიდიებს ამ მიმართულებით. სამეგრელოში ჩვენ გვაქვს უნიკალური ყურძნის ჯიშები და სამწუხაროდ, არ არსებობდა პროგრამა, რომელიც საშუალებას მოგვცემდა ეს პოტენციალი სრულად წარმოგვედგინა. აქედან გამომდინარე, მიღებულია გადაწყვეტილება და მევენახეობის მიმართულებითაც ჩვენ დავიწყებთ და გავზრდით სუბსიდირებას ამ ლამაზ კუთხეში“, - განაცხადა ბახტაძემ.

მისივე განმარტებით, მთავრობა ყველაფერს გააკეთებს იმისთვის, რომ სიღარიბე დაძლეული იყოს.

„ჩვენ გავაკეთებთ ყველაფერს იმისთვის, რომ სრულად შევძლოთ ამ რეგიონში სოფლის მეურნეობის პოტენციალის ათვისება იმ მარტივი მიზეზიდან გამომდინარე, რომ ეს არის სწორი გზა იმისთვის, რომ ქართველი ფერმერი იყოს წარმატებული, იმისთვის, რომ საქართველო იყოს წარმატებული, იმისთვის, რომ ჩვენ გადავდგათ პრინციპული ნაბიჯები სიღარიბის დასაძლევად. ჩვენ ყველას კარგად გვესმის, სიღარის დაძლევის გარეშე ჩვენი სამშობლო ვერ იქნება წარმატებული“, - განაცხადა ბახტაძემ.

იოსებ ბარათაშვილი - ახლა მთავარია, გამოძიებამ უტყუარად დაადგინოს იმ პირების ვინაობა, რომელთა ქმედებამაც გამოიწვია შაქარაშვილის გარდაცვალება
ქართული პრესის მიმოხილვა 10.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ყაზახეთ-საქართველოს თანამშრომლობის ახალი ეტაპი იწყება
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ