ძლიერმა სეტყვამ და წვიმამ კასპის მუნიციპალიტეტი დააზარალა. სეტყვის შედეგად, საოკუპაციო ხაზის სიახლოვეს მდებარე სოფლებში: საკორინთლო, ვაკე, პანტიანი, ახალშენა, ქვემო ჭალა, განადგურდა კურკოვანი ხილის დიდი ნაწილი.

ადგილობრივების თქმით, დაზიანებულია კაკლის ნარგავები და ვაზი.

„უამინდობამ გარკვეული ზარალი მიაყენა შიდა ქართლის რეგიონის ცალკეულ სოფლებს. გუშინ საღამოს დაზიანდა ბუნებრივი აირის მილსადენიც, თუმცა, შესაბამისი სამსახურების წარმომადგენლები, რეგიონის ხელმძღვანელობასთან კოორდინირებულად უკვე მუშაობენ პრობლემის მოსაგვარებლად და სავარაუდოდ, დღის ბოლომდე აღუდგება ქვემო ჭალის მოსახლეობას გაზის მიწოდება“, - განაცხადა ,,ინტერპრესნიუსთან“ საუბრისას შიდა ქართლის გუბერნატორმა გიორგი ხოჯევანიშვილმა.