არსებული ინფორმაციით, სოფელ ყანდაურაში 4 ადამიანის მკვლელობაში ბრალდებულის შვილი, რომელსაც პოლიცია ეძებს, ყოფილი სპეცრაზმელია
არსებული ინფორმაციით, სოფელ ყანდაურაში 4 ადამიანის მკვლელობაში ბრალდებულის შვილი, რომელსაც პოლიცია ეძებს, წლების განმავლობაში ძალოვან სტრუქტურებში მუშაობდა, ის ყოფილი სპეცრაზმელია. აღნიშნული ინფორმაცია „კვირის პალიტრამ“ მოიპოვა.
არსებული ინფორმაციით, სოფელ ყანდაურაში მომხდარი მკვლელობის საქმეზე სამართალდამცავები ერთ პირს, დაკავებული 85 წლის ომარ გამყრელიძის შვილს, ნოდარ გამყრელიძეს ეძებენ.
„კვირის პალიტრის“ ინფორმაციით, ნოდარ გამყრელიძე წლების განმავლობაში ძალოვან სტრუქტურებში მუშაობდა, თუმცა ამ ეტაპზე ის სისტემაში არ მუშაობს. არსებული ინფორმაციით, ნოდარ გამყრელიძე, მიუხედავად ძმის, რძლისა და ორი ნათესავის მკვლელობისა, სოფელ ყანდაურაში არ გამოჩენილა.
ამ ეტაპზე ასევე დაკავებულია გამყრელიძეების ოჯახის კიდევ ერთი წევრი, ბრალდებულ ომარ გამყრელიძის შვილიშვილი - ომარ გამყრელიძე. ახალგაზრდა მამაკაცს გამოძიება ცეცხლსასროლი იარაღისა და საბრძოლო მასალების შენახვა-ტარებას ედავება. დაკავებული ახალგაზრდის ჩვენებით, მისი მამა ნოდარ გამყრელიძე რუსეთში აპირებდა წასვლას. მისივე ინფორმაციით, ამის დამადასტურებელი ვიზა მამის პასპორტში ნახა.
შინაგან საქმეთა სამინისტროს ინფორმაციით კი, ნოდარ გამყრელიძეს საზღვარი ოფიციალურად არ გადაუკვეთავს. გამორიცხული არ არის, რომ ის ოკუპირებული ტერიტორიიდან გადავიდა რუსეთის ტერიტორიაზე.
შეგახსენებთ, რომ სოფელ ყანდაურაში 3 მაისს 4 ადამიანი მოკლეს და ერთი დაჭრეს. მომხდარ დანაშაულთან დაკავშირებით მიმდინარე გამოძიების ფარგლებში სასამართლო-სამედიცინო ექსპერტიზის პირველადი ინფორმაციით დადგინდა, რომ ადგილზე სროლა ორი სხვადასხვა იარაღით განხორციელდა. შემთხვევის ადგილიდან კი ამ ეტაპზე ამოღებულია მხოლოდ ერთ-ერთი მათგანი.
