საერთაშორისო სავალუტო ფონდის აღმასრულებელ დირექტორთა საბჭო  საქართველოს პროგრამას ივნისში განიხილავს

ფინანსთა მინისტრი ივანე მაჭავარიანი საერთაშორისო სავალუტო ფონდის მისიის წევრებს შეხვდა, რომლებიც „გაფართოებული დაფინანსების მექანიზმით" მიმდინარე პროგრამის მეოთხე მიმოხილვის ფარგლებში, საქართველოში სამუშაო ვიზიტით იმყოფებიან. მისიას მერსედეს ვერა მარტინი ხელმძღვანელობს.

ფინანსთა სამინისტროს ინფორმაციით, მხარეებმა მიმოიხილეს ქვეყნის ეკონომიკური მდგომარეობა, 2019 წლის ბიუჯეტის შესრულების შედეგები, განიხილეს მიმდინარე და დაგეგმილი ეკონომიკური რეფორმები, მათ შორის, განათლების რეფორმისა და ადამიანური კაპიტალის განვითარებისთვის გათვალისწინებული ფისკალური ჩარჩო.

„ჩვენ გვაქვს მოლოდინი, რომ მისია პოზიტიურად შეფასდება. დელეგაცია დადებითად აფასებს ქვეყნის ეკონომიკურ მდგომარეობას. წელს, საერთაშორისო სავალუტო ფონდის მიერ საქართველოს ეკონომიკური ზრდა 4.6 პროცენტის ფარგლებშია პროგნოზირებული, რაც რეგიონში ყველაზე მაღალი მაჩვენებელია. მნიშვნელოვანია, რომ საერთაშორისო სავალუტო ფონდი სრულ მხარდაჭერას უცხადებს მთავრობის მიერ განხორციელებულ რეფორმებს. სწორედ ეკონომიკური რეფორმებია დასახელებული ქვეყნის მაღალი ეკონომიკური ზრდის ერთ-ერთ მთავარ ფაქტორად მომავალ წლებში“, - აღნიშნა ფინანსთა მინისტრის მოადგილემ ნიკოლოზ გაგუამ.

სსფ-ის მისიის ხელმძღვანელმა მერსედეს ვერა მარტინმა განაცხადა, რომ შეხვედრაზე ასევე, განიხილეს სამომავლო გეგმები განათლების რეფორმის განხორციელებასთან დაკავშირებით.

„გვქონდა ძალიან ნაყოფიერი შეხვედრა ფინანსთა მინისტრთან. შედგა დისკუსია ბიუჯეტის შესრულებისა და საინვესტიციო პროგრამების მიმდინარეობის გარშემო. ასევე, განვიხილეთ სამომავლო გეგმები განათლების რეფორმის განხორციელებასთან დაკავშირებით. მისიის ფარგლებში, გვაქვს შეხვედრები ხელისუფლების სხვადასხვა წარმომადგენელთან და ეროვნულ ბანკთან. იმედი გვაქვს, რომ შემფასებელი მისია წარმატებით დაასრულებს "გაფართოებული დაფინანსების მექანიზმით" მიმდინარე პროგრამის მეოთხე მიმოხილვას“, - განაცხადა სსფ-ის მისიის ხელმძღვანელმა.

როგორც მან აღნიშნა, საქართველოს პროგრამას სსფ-ის აღმასრულებელ დირექტორთა საბჭო მიმდინარე წლის ივნისში განიხილავს.

ფინანსთა სამინისტროში გამართულ შეხვედრას დაესწრნენ მინისტრის მოადგილეები, სსფ-ის მუდმივი წარმომადგენელი საქართველოში ფრანსუა პეშო, ასევე, მისი მომავალი შემცვლელი - სელიმ შეკირი, რომელიც საერთაშორისო სავალუტო ფონდის მუდმივი წარმომადგენელის უფლებამოსილებას ოფიციალურად ივნისში შეუდგება.

ვიქტორ ყიფიანი - შავი ზღვის რეგიონისადმი დასავლეთის მიდგომა ოპერატიულად გადახედვასა და მისადაგებას საჭიროებს
ქართული პრესის მიმოხილვა 03.07.2020
კახა კუკავა - „თავისუფალი საქართველოს“ გარდა, მთელი პოლიტიკური სპექტრი დაშლილებში აწყობილი პარტიებია - ზოგი „ქოცების“ დაშლილებია, ზოგი „ნაცების“
ყაზახეთის რესპუბლიკის ელჩი საქართველოში - ყაზახეთის მიღწევა: პირველი პრეზიდენტის ნ. ნაზარბაევის როლზე (R)
თიბისი იპოთეკური სესხების სუბსიდირების სახელმწიფო პროგრამაში ერთვება
როგორ ვლინდება ლაქტოზის აუტანლობა და რით შეგვიძლია ჩავანაცვლოთ ცხოველური რძე ბავშვთა კვებაში?
მაკა ასათიანი განცხადებას ავრცელებს
„მზადება ზაფხულისთვის“  (R)
"პროკრედიტ ბანკმა" საკუთარი მზის ელექტროსადგური წარადგინა