შინაგან საქმეთა მინისტრის მოადგილის ნათია მეზვრიშვილის შეფასებით, ნარკოპოლიტიკის ლიბერალიზაციასთან დაკავშირებით, დეპუტატთა ჯგუფის მიერ მომზადებული საკანონმდებლო პაკეტი უკიდურესად ლიბერალურია ყველა მიმართულებით.
როგორც მეზვრიშვილმა ჟურნალისტებთან საუბრისას აღნიშნა, სწორედ ამან გამოიწვია აზრთა სხვადასხვაობა ინიცირებულ კანონპროექტზე.
„შინაგან საქმეთა სამინისტრო ნარკოპოლიტიკის მიმართულებით საკმაოდ მკაფიო პოლიტიკას ატარებს. ამოღებულია კილოგრამობით ნარკოტიკული საშუალებები. განსაკუთრებით მკაცრები ვიყავით ნარკოტიკული საშუალებების გამსაღებლების მიმართ, მათ შორის ინტერნეტის მეშვეობით გამავრცელებელთა მიმართ, რაც რთულად გამოსავლენია, მაგრამ ჩვენ ეს შევძელით და გამსაღებელთა წინააღმდეგ დაუნდობელი ბრძოლა გამოვაცხადეთ. რაც შეეხება მოხმარებასთან დაკავშირებულ საკითხებს - უნდა მოხდეს თუ არა მოხმარების დეკრიმინალიზაცია, ეს მხოლოდ შინაგან საქმეთა სამინისტროს გადასაწყვეტი საკითხი არ არის – ჩვენი პოზიცია მარტივია, ისეთი კანონი არ უნდა მივიღოთ, რაც ნარკოტიკების მოხმარებას, შენახვას და გასაღებას რაიმე ფორმით წაახალისებს“, - განაცხადა ნათია მეზვრიშვილმა.