განათლების, მეცნიერების, კულტურის და სპორტის მინისტრმა მიხეილ ბატიაშვილმა განათლების კომპლექსური რეფორმის ფარგლებში, ზოგადი განათლების მიმართულებით გასახორციელებელ ცვლილებებზე არასამთავრობო და საერთაშორისო დონორი ორგანიზაციების წარმომადგენლებთან ერთად იმსჯელა. ამის შესახებ „ინტერპრესნიუსს“ განათლების, მეცნიერების, კულტურისა და სპორტის სამინისტროდან აცნობეს.
მათი ინფორმაციით, მიმდინარე რეფორმასთან დაკავშირებით ექსპერტებმა საკუთარი მოსაზრება დააფიქსირეს.
არასამთავრობო ორგანიზაცია „მშობლები განათლებისთვის“ აღმასრულებელი დირექტორი მეგი კავთუაშვილი მიიჩნევს, რომ განათლების სექტორი ძალიან დიდი ხანია ელოდება ამ რეფორმას.
„განათლების სექტორი ძალიან დიდი ხანია ელოდება ამ რეფორმას. მით უფრო საინტერესოა, ეს შემოთავაზება, რომ არ ეფუძნება ძალდატანებას, მასწავლებლებს აქვთ არჩევანის თავისუფლება, სურვილის შემთხვევაში, გააგრძელონ კარიერული წინსვლა და განვითრდნენ. ეს მშობლებისთვის ძალიან მნიშვნელოვანია, რადგან შვილები სკოლაში იმიტომ არ დაგვყავს, რომ სადმე დრო დახარჯონ, არამედ გვინდა, რომ დრო ძალიან მიზნობრივად გაატარონ ისეთ მასწავლებლებთან, რომლებიც პასუხობენ თანამედროვე განათლების სტანდარტებს. ჩვენ ამ ყველაფერს ვაფასებთ, როგორც ძალიან დადებით მოვლენას და გვიხარია, რომ ეს საკითხი დღის წესრიგში დადგა“, - განაცხადა მეგი კავთუაშვილმა.