„ნაციონალური მოძრაობის“ წევრის, კობა ნაყოფიას განცხადებით, თუ ზუგდიდში მომხდარ ინციდენტში დამნაშავეებს დღის ბოლომდე არ დააკავებენ, მასშტაბურ აქციას გამართავენ.

„პოლიციის უფროსი არის მათი უშუალო მფარველი, რადგან დიდი ხანია იდენტიფიცირებულია და პირველი შემთხვევა არ არის. ერთ -ერთი დამრბევია მშვიდობიანი შეხვედრების. ვაფრთხილებთ პოლიციის უფროსს, თუ დღეს, დღის ბოლომდე ეს ადამიანები არ იქნებიან დაკავებული, ჩვენ აქ მოვაწყობთ აქციებს ", - განაცხადა ნაყოფიამ.

შეგახსენებთ, „ნაციონალური მოძრაობის“ ინფორმაციით, ზუგდიდის მერობის კანდიდატ სანდრა რულოვსსა და პარტიის სხვა წარმომადგენლებს თავს დაესხნენ.

როგორც „ინტერპრესნიუსს“ პარტიაში განუცხადეს, შემთხვევა იმ დროს მოხდა, როცა სანდრა რულოვსი და „ნაციონალური მოძრაობის“ სხვა ლიდერები, დადიანების ეზოში იყვნენ და ადგილობრივ მედიასაშუალებას ინტერვიუს აძლევდნენ.

„მათ 5 ადამიანი დაესხა თავს. ესენი იყვნენ „ქართული ოცნების“ წარმომადგენლები, ის პირები, რომლებიც ჩვენს წარმომადგენლებს ასევე დაესხნენ თავს, რამდენიმე დღის წინ სოფელ რიყეში. მათ ჩვენი პარტიის ფოტოგრაფს და კიდევ რამდენიმე ადამიანს მიაყენეს ფიზიკური შეურაცხყოფა“, - განაცხადეს პარტიაში.