საქართველოს პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძე და გარემოს დაცვისა და ბუნებრივი რესურსების კომიტეტის თავმჯდომარე, კახა კუჭავა საჯარო და კერძო სექტორებს შორის დიალოგის საპარლამენტო პლატფორმის განვითარებაში შეტანილი წვლილისთვის დაჯილდოვდნენ. როგორც „ინტერპრესნიუსს“ პარლამენტის პრესსამსახურიდან აცნობეს, დიალოგის საპარლამენტო პლატფორმის აქტივობებში ყველაზე ინტენსიური და პროდუქტიული ჩართულობისთვის ჯილდოები დეპუტატებმა - ლევან კობერიძემ, ბექა ნაცვლიშვილმა და რომან გოცირიძემ მიიღეს.

ბიზნესისა და ეკონომიკის ცენტრთან, როგორც დიალოგის საპარლამენტო პლატფორმასთან ყველაზე აქტიური და ნაყოფიერი თანამშრომლობისთვის, ჯილდო, ასევე, პარლამენტის დარგობრივი ეკონომიკისა და ეკონომიკური პოლიტიკის კომიტეტის აპარატის უფროსს, თამილა შაბაშვილს გადაეცა.

სტუმრები ბრიტანულმა საერთაშორისო ასოციაციამ - „ბიზნესისა და პარლამენტის საერთაშორისო დიალოგმა“ დააჯილდოვა.

საჯარო და კერძო სექტორებს შორის დიალოგის საპარლამენტო პლატფორმის მხარდამჭერთა, პარტნიორთა და მონაწილეთა ყოველწლიური დაჯილდოების ცერემონიაზე, რომელსაც „ბიზნესისა და პარლამენტის საერთაშორისო დიალოგის“ აღმასრულებელმა თავმჯდომარემ, ფრედერიკ რ. ჰაიდ ჩემბერსმა და საერთაშორისო თავმჯდომარემ, კის იანგმა უმასპინძლეს, საქართველოს პარლამენტის წევრებმა საჯარო და კერძო სექტორს შორის თანამშრომლობის მნიშვნელობაზე კიდევ ერთხელ გაამახვილეს ყურადღება.

სიტყვით გამოსვლისას, საფინანსო-საბიუჯეტო კომიტეტის თავმჯდომარემ ხაზგასმით აღნიშნა, რომ პარლამენტის წევრებისთვის ერთ-ერთი უმთავრესი ამოცანა ბიზნესის ხელშეწყობაა.

„ჩვენი ამოცანა, პარლამენტარებისთვის, განსაკუთრებით, კომიტეტისთვის, რომელსაც მე ვხელმძღვანელობ, არის არა მარტო საფინანსო-საბიუჯეტო კომიტეტში რეფორმების გატარება, არამედ, ბიზნესის ხელშეწყობა, განსაკუთრებით, საფინანსო სფეროში. სახელმწიფო სექტორში დასაქმებული თითოეული ადამიანის ამოცანა გახლავთ, რამდენადაც შესაძლებელია, კერძო სექტორში მომუშავე კომპანიებისთვის, ხელის შეწყობა. მე და ჩვენი კომიტეტი თითოეული თქვენგანისთვის მსახურების რეჟიმში ვარ და ყოველთვის ვიქნებით თქვენს გვერდით. ეს ჯილდოც ამას შეუწყობს ხელს“, - განაცხადა ირაკლი კოვზანაძემ.

გარემოს დაცვისა და ბუნებრივი რესურსების კომიტეტის თავმჯდომარის განცხადებით, მუშაობა მიმდინარეობს ბევრ საინტერესო ინიციატივაზე.

კახა კუჭავამ გარემოს დაცვისა და ბუნებრივი რესურსების საკითხებთან დაკავშირებით, ფართო და საჯარო დისკუსიების გამართვის მნიშვნელობაზე გაამახვილა ყურადღება.

„მიხარია, რომ ის საქმე, რომელსაც ვაკეთებთ, კარგ შედეგამდე მივიდა. ბევრი საინტერესო ინიციატივა გვაქვს, ძალიან ბევრ საკითხზე ვმუშაობთ, თუმცა, შეუძლებელი იქნებოდა ამ წარმატების მიღწევა, რომ არა თქვენი მხარდაჭერა. განსაკუთრებულ მადლობას ვუხდი ბიზნესისა და ეკონომიკის ცენტრს და დონორ ორგანიზაციებს. რთული იქნებოდა, მათ გარეშე განვახორციელოთ ის ახალი ინიციატივები, რომელიც ძალიან გვჭირდება, განსაკუთრებით, ჩვენს კომიტეტს, რადგან, გარემოს დაცვის და ბუნებრივი რესურსების საკითხები ადრე არ იყო ისეთი აქტუალური, ამ საკითხებზე არ ხორციელდებოდა ფართო, საჯარო დისკუსიები და მიმაჩნია, რომ არა მხოლოდ დრო დადგა, არამედ, აუცილებელიც არის, რომ ყველამ ერთად მივიღოთ ამ პროცესებში მონაწილეობა“, - განაცხადა სიტყვით გამოსვლისას კახა კუჭავამ.

ბიზნესისა და ეკონომიკის ცენტრთან, როგორც დიალოგის საპარლამენტო პლატფორმასთან ყველაზე აქტიური და ნაყოფიერი თანამშრომლობისთვის ჯილდოები, ასევე, სს „გალტ ენდ თაგარტს“ და საქართველოს ენერგეტიკისა და წყალმომარაგების მარეგულირებელი ეროვნულ კომისიას (სემეკი) გადაეცათ.

დაჯილდოების ცერემონიას, რომელიც ბიზნესისა და ეკონომიკის ცენტრის ორგანიზებით და ფონდ „კრისტალს“ მხარდაჭერით გაიმართა, საქართველოს საკანონმდებლო და აღმასრულებელი ხელისუფლების, საერთაშორისო და ადგილობრივი არასამთავრობო ორგანიზაციების, კერძო სექტორისა და აკადემიური წრეების წარმომადგენლები ესწრებოდნენ.