აშშ-ის შეიარაღებული ძალების ევროპულმა სარდლობამ ევროპაში სამხედრო სწავლების სერია დაიწყო

აშშ-ის შეიარაღებული ძალების ევროპულმა სარდლობამ, ევროპის უსაფრთხოებისა და სტაბილურობის მხარდასაჭერად და რუსეთის აგრესიის შესაკავებლად, ევროპაში სამხედრო სწავლების სერია დაიწყო. ამის შესახებ ინფორმაციას სარდლობა საკუთარ ვებგვერდზე ავრცელებს.

მათივე ცნობით, სწავლებათა სერია, სახელწოდებით Immediate Response, ხორვატიაში, უნგრეთსა და სლოვენიაში იმართება. აღნიშნული სწავლებები სარდლობის მიერ ადრე დაგეგმილი ექვსიდან პირველია, რომელიც ევროპაში 2019 წლის მაისიდან სექტემბრამდე გაგრძელდება. დანარჩენი სწავლება სექტემბერში დასრულდება და გაიმართება როგორც ნატოს წევრ ქვეყნებში - ბულგარეთში, გერმანიაში, ისლანდიაში, იტალიასა და რუმინეთში, ისე პარტნიორ ქვეყნებში - საქართველოსა და უკრაინაში.

„სამხედრო სწავლების სერიათა მიზანია ერთობლივი სამხედრო ძალების შექმნა, რომელიც მზად იქნება შეასრულოს სამხედრო ამოცანათა სრული სპექტრი. ეს შეთანხმებულია ჩვენს მოკავშირეებთან და პარტნიორებთან ამერიკის ეროვნული ინტერესების დასაცავად, რუსული აგრესიის შესაკავებლად და ევროპაში სტაბილურობისა და უსაფრთხოების მხარდასაჭერად“, - განაცხადა ამერიკელმა გენერალ-მაიორმა ჯონ ჰილმა.