უკრაინის უშიშროებისა და თავდაცვის საბჭოს მდივანმა ალექსანდრ ტურჩინოვმა და სააგარეო საქმეთა მინისტრმა პაველ კლიმკინმა თანამდებობები დატოვეს. ამის შესახებ უკრაინული მედია იუწყება.
ტურჩინოვის განცხადებით, მისი გადადგომა პრეზიდენტ პეტრო პოროშენკოს საპრეზიდენტო უფლებამოსილების დასრულებას უკავშირდება.
მისივე თქმით, იმის გათვალისწინებით, რომ რუსეთის მიერ უკრაინის წინააღმდეგ შეიარაღებული აგრესია გრძელდება, მზად არის, კვლავაც უშუალოდ დაიცვას ქვეყანა ნებისმიერ სამხედრო ქვედანაყოფში და სამხედრო დაჯგუფებაში ყოფნით.
უკრაინის საგარეო საქმეთა მინისტრმა პაველ კლიმკინმა კი განაცხადა, რომ გადადგომის შესახებ განცხადებას 20 მაისს ქვეყნის უმაღლეს რადას და ახლად არჩეულ პრეზიდენტს გადაუგზავნის.
„მიმაჩნია, რომ ასე მართებულია როგორც ადამიანურად, ისე პოლიტიკური კულტურის მხრივ. მე ამის შესახებ წინასწარ ვაცნობე უკრაინის ახლად არჩეულ პრეზიდენტს. მას უნდა ჰქონდეს უფლება, ჰყავდეს თავისი საგარეო პოლიტიკური გუნდი საგარეო პოლიტიკური სტრატეგიის მოსაწყობად, მაგრამ ვუთხარი, რომ მზად ვარ დავეხმარო ყველგან, სადაც დაემთხვევა ჩვენი პრინციპები და ხედვები“, - აცხადებს კლიმკინი.