მარნეულში, N2 საარჩევნო უბნიდან „ნაციონალური მოძრაობის" წარმომადგენელი გამოაძევეს
მარნეულის მუნიციპალიტეტის N2 საარჩევნო უბნიდან „ერთიანი ნაციონალური მოძრაობის" წარმომადგენელი, თამარ მეტრეველი გამოაძევეს.
როგორც მეტრეველმა ჟურნალისტებს განუცხადა, ეს პოლიტიკური გადაწყვეტილებაა, რადგან დარღვევების მითითების გამო, მის მიმართ უბნის მდივანი აგრესიულობით გამოირჩეოდა.
„დარღვევებზე თვალს არ ვხუჭავდი და ეს არ მოსწონდათ. თურმე, მე ვარღვევ რაღაც კანონს და საარჩევნო პროცესს ვუშლი ხელს. დღის განმავლობაში ბევრი დარღვევა იყო, საოლქოს წარმომადგენელიც იყო მოსული და რაღაც კუთხით, პრობლემა მოაგვარა, მაგრამ მისი წასვლის შემდეგ იგივე პრობლემები იყო. დღის განმავლობაში საშუალება არ მომცეს საჩივარი დამეწერა", - განაცხადა მეტრეველმა.
