ოპოზიციური პარტიები მეორე ტურში მიუმხრობლობას შეინარჩუნებენ, - ასე უპასუხა მთაწმინდის მაჟორიტარობის კანდიდატმა ლადო კახაძემ „ინტერპრესნიუსის“ კითხვას - რა მოხდება თუკი მეორე ტურში, არჩევნებში მონაწილე ყველა სუბიექტი მხარს მის კონკურენტს შალვა შავგულიძეს დაუჭერს.
„ჩვენ მხარდამჭერთა დიდი პოტენციალი გვაქვს. მათი გააქტიურება ჩვენი გამარჯვების საწინდარია - ეს პირველი; მეორე- პოლიტიკურ ველზე, საკონკურენციო ველზე გამოსული პოლიტიკური ძალები, რამდენადაც ვიცი არიან მიუკერძოებლები და თავის ამომრჩევლის მიმართ მართალნი, ამიტომ ისინი მიუმხრობრლობას შეინარჩუნებენ, რათა როგორც თვითონ ამბობენ ასოცირება არ უნდათ არც იმ ძალასთან და არც ამ ძალასთან“ , - განაცხადა ლადო კახაძემ.
„ინტერპრესნიუსის“ კითხვაზე, დამკვიდრდა თუ არა მთაწმინდის საარჩევნო ოლქში არჩევნების დღეს ახალი პოლიტიკური კულტურა, როგორც ეს „პალიტრანიუსის“ გადაცემა NEWSROOM-ში "ქართული ოცნების" გენერალურმა მდივანმა კახი კალაძემ განაცხადა, ლადო კახაძემ ასე უპასუხა: „რეალურად ასე იყო. მხოლოდ სამ გაუგებრობას ჰქონდა ადგილი. სამი საჩივარი დაიწერა. ეს არის მართლა პირველი მცდელობა საქართველოში მომდევნო არჩევნებიც ამ ფორმატში წარიმართოს. ეს ქვეყნისათვის და მის მოსახლეობისთვის ძალიან სასარგებლო იქნება“, - განაცხადა ლადო კახაძემ.