ოკუპირებული აფხაზეთის დე ფაქტო ლიდერი ოპოზიციას, რომელმაც 20 მაისიდან უვადო პროტესტი დაიწყო, „ხელისუფლების მიტაცების მცდელობაში“ ადანაშაულებს. რაულ ხაჯიმბას თქმით, ოპოზიციის ქმედება სწორედ „ხელისუფლების მიტაცების მცდელობას“ ადასტურებს.
„უკვე ვისაუბრე კონსტუტუციით დადგენილ ვადებში საპრეზიდენტო არჩევნების მშვიდად ჩატარების აუცილებლობაზე. თუმცა, ოპოზიციის ქმედებები ართულებს საზოგადოებრივ-პოლიტიკურ მდგომარეობას. ფაქტები, რომლებსაც ვაკვირდებით ბოლო დღეების განმავლობაში, ცხადყოფს ხელისუფლების ხელში ჩაგდების მცდელობას იმის მიუხედავად, რომ ოპოზიციის ლიდერები ცდილობენ ახსნან ეს დემოკრატიული მისწრაფებებით. მოგიწოდებთ, არ აყვეთ პროვოკაციებს, გამოიჩინოთ თავშეკავება და დაკვირვებულობა“ - ნათქვამია რაულ ხაჯიმბას მიმართვაში.