ამპუტანტ ფეხბურთელთა ევროპის ჩემპიონთა ლიგის თასის მოსაპოვებლად მატჩები თბილისში გაიმართება

მიმდინარე წლის 25-26 მაისს, ევროპის ამპუტანტ ფეხბურთელთა ფედერაციისა და საქართველოს ფეხბურთის ფედერაციის ორგანიზებით და ვეტერანების საქმეთა სახელმწიფო სამსახურისა და თავდაცვის სამინისტროს ხელშეწყობით, დავით პეტრიაშვილის სახელობის სპორტულ არენაზე ჩატარდება საფეხბურთო მატჩები ამპუტანტ ფეხბურთელთა ევროპის ჩემპიონთა ლიგის თასის მოსაპოვებლად.

როგორც „ინტერპრესნიუსს“ ვეტერანების საქმეთა სახელმწიფო სამსახურიდან აცნობეს, ჩემპიონატში მონაწილეობას იღებენ საქართველოს, ირლანდიის, ინგლისის, პოლონეთის, თურქეთისა და რუსეთის ამპუტანტ ფეხბურთელთა ჩემპიონი გუნდები.

მათივე ინფორმაციით, ჩემპიონატის გახსნის პირველი მატჩი 25 მაისს, 10:30 საათზე, რუსეთისა და საქართველოს ჩემპიონ გუნდებს შორის დავით პეტრიაშვილის სახელობის სპორტულ არენაზე (ბელიაშვილის ქ. ამერიკის საელჩოს უკან) გაიმართება.

„ამპუტანტ ფეხბურთელთა ევროპის ჩემპიონთა ლიგის მატჩებს ევროპის ამპუტანტ ფეხბურთელთა ფედერაციის პრეზიდენტი, მათეუშ ვიდლაკი, ვიცე-პრეზიდენტი, საიმონ ბეიკერი და ფედერაციის სხვა პასუხისმგებელი თანამდებობის პირები დაესწრებიან.

დასწრება თავისუფალია“, - ნათქვამია აღნიშნულ ინფორმაციაში.