იუსტიციის უმაღლესი საბჭოს სხდომების ღიაობის საკითხი კანონით დარეგულირდება და მისი დახურვა მხოლოდ გამონაკლის შემთხვევაში იქნება შესაძლებელი, რაც ასევე კანონით გაიწერება. ამის შესახებ საქართველოს პარლამენტის თავმჯდომარემ ირაკლი კობახიძემ ჟურნალისტებს განუცხდა. მისივე ინფორმაციით, ცვლილება ასევე მოიცავს საბჭოს მიერ მიღებული გადაწყვეტილებების გამოქვეყნების აუცილებლობასაც.

„ჩვენ ეს რეკომენდაცია გავითვალისწინეთ და საგანგებოდ ჩნდება ჩანაწერი კანონში, რომლის მიხედვითაც, იუსტიციის უმაღლესი საბჭო უზრუნველყოფს მისი სხდომების საჯაროობას და ასევე მკაფიოდ იწერება ის თუ რა გამონაკლის შემთხვევებში არის შესაძლებელი საბჭოს სხდომების დახურვა. ჩვენ მთლიანად გავითვალისწინეთ შესაბამისი რეკომენდაცია ზოგადად ამ ნაწილზე. საჯაროობის ნაწილზე გვექნება კიდევ ერთი შემაჯამებელი მსჯელობა და დარწმუნებული ვარ, რომ გვექნება მთლიანად კონსენსუსი.

იგივე ეხება გადაწყვეტილებების გამოქვეყნებას. ასევე პროექტების გამოქვეყნებასთან დაკავშირებით იყო რეკომენდაციები და გავითვალისწინეთ. ასევე მუდმივად მოხდება სტატისტიკური ინფორმაციის გამოქვეყნება, რომელიც არის დაკავშირებული საბჭოს საქმიანობასთან. ანუ ამ ნაწილში, ღიაობის ნაწილში საჯაროობის ნაწილში უკვე ასახულია რეკომენდაციების ნაწილი პროექტში და შესაბამისად, გვაქვს ოპტიმისტური განწყობა",- განაცხადა კობახიძემ.

პარლამენტის თავმჯდომარე ირაკლი კობახიძე მართლმსაჯულების რეფორმის მეოთხე ტალღის საკითხებთან დაკავშირებით დიპლომატიური კორპუსის, არასამთავრობო ორგანიზაციებისა და ხელისუფლების სამივე შტოს წარმომადგენლებთან შემაჯამებელ შეხვედრას მართავს.