„ვგმობთ ძალადობას", „უარი შერჩევით სამართალს", - ამ მოწოდებებით ქუთაისში აქცია გაიმართა. ჟურნალისტებმა ტელეკომპანია "რუსთავი 2“-ის გუნდზე მომხდარი ძალადობა დაგმეს. მათი თქმით, ჟურნალისტები ხალხის სამსახურში არიან და მათთვის საქმიანობაში ხელის შეშლა დანაშაულია.

„ვაპროტესტებთ ძალადობას და ხელისშეშლას ჟურნალისტურ საქმიანობაში. გვინდა, დღევანდელი აქცია იყოს გზავნილი საზოგადოებისთვის, რომ ჟურნალისტები არიან მათ სამსახურში და არა ძალადობის ობიექტები. ეს შეიძლება იმითაც არის განპირობებული, რომ საზოგადოება ნაკლებად არის ინფორმირებული, რომ ჟურნალისტურ საქმიანობაში ხელშეშლა არის დასჯადი და ესეც იყო აქციის ერთ-ერთი გზავნილი", -განაცხადეს აქციის მონაწილეებმა.

„რუსთვი 2“-ის გადამღებ ჯგუფს წყალტუბოში თავს 23 მაისს დაესხნენ. დაკავებულები გირაოს სანაცვლოდ გათავისუფლდნენ.

გამოძიება სისხლის სამართლის კოდექსის 126 მუხლის პირველი პრიმა ნაწილის „ბ” ქვეპუნქტით (ჯგუფურად ძალადობა) და 154-ე მუხლის მეორე ნაწილით (ჟურნალისტისთვის პროფესიული საქმიანობის უკანონო ხელის შეშლა) გრძელდება.