კობა გვენეტაძემ დაადასტურა, რომ ლარის ეს რყევა გადაიზრდება ფასების ისეთ ზრდაში, რომელიც აისახება ჩვენი მოქალაქეების ჯიბეზე,- ამის შესახებ „ევროპული საქართველოს" წევრმა ზურაბ ჭიაბერაშვილმა ჟურნალისტებს განუცხადა, რითაც გამოეხმაურა ეროვნული ბანკის პრეზიდენტის გუშინდელ განცხადებას ლარის კურსთან დაკავშირებით. ჭიაბერაშვილის თქმით, შექმნილი მდგომარეობიდან გამოსავალი არის ნაკლები რეგულაცია და დაბალი გადასახადები.
„ყველაზე საგანგაშო, რაც გუშინ მოვისმინეთ, იყო ეროვნული ბანკის პრეზიდენტის კობა გვენეტაძის განცხადება, რომ ინფლაცია, ანუ ფასების ზრდა გადააჭარბებს სამიზნე მაჩვენებელს. მან დაადასტურა, რომ ლარის ეს რყევა გადაიზრდება ფასების ისეთ ზრდაში, რომელიც აისახება ჩვენი მოქალაქეების ჯიბეზე და შესაბამისად, ძალიან გააუარესებს მათ სოციალურ-ეკონომიკურ მდგომარეობას. კარგად უნდა გვესმოდეს, რომ საბანკო რეგულაციებით კობა გვენეტაძემ უკვე შეზღუდა ჩვენი ეკონომიკური ზრდა და ახლა ის უფრთხის მონეტარული განაკვეთის გაზრდას, რომ კიდევ არ შეამციროს ეკონომიკური ზრდა. არადა ამ მდგომარებიდან გამოსავალი არის დაბალი გადასახადები და ნაკლები რეგულაცია. სხვაგვარად შეუძლებელი იქნება, საქართველომ წინააღმდეგობა გაუწიოს იმ მდგომარეობას, რაშიც დღეს ლარი აღმოჩნდა,"- განაცხადა ზურაბ ჭიაბერაშვილმა.