საპარლამენტო უმრავლესობის წევრის, ანრი ოხანაშვილის განცხადებით, პერსონალურ მონაცემთა დაცვის სახელმწიფო ინსპექტორის სამსახურს ექნება როგორც პერსონალურ მონაცემთა დაცვაზე კომპეტენცია, ისე შესაძლო დანაშაულის შემთხვევაში, გამოძიების წარმოების ფუნქციაც.

როგორც ოხანაშვილმა აღნიშნა, პერსონალურ მონაცემთა დაცვის სპექციის ხელმძღვანელი, კვალიფიციური, პროფესიონალი და სანდო პირი უნდა იყოს.

"სახელმწიფო ინსპექტორის სამსახური, არის და იქნება ყველაზე მნიშვნელოვანი სამსახური, რომელსაც ერთის მხრივ, ექნება პერსონალური მონაცემების დაცვაზე კომპეტენცია და ამის უზრუნველყოფა და მეორე მხრივ, სამართალდამცავი ორგანოების მიერ შესაძლო დანაშაულის შემთხვევაში, გამოძიების წარმოების ფუნქცია. ეს არის ძალიან მნიშვნელოვანი სამსახური, რომლის ხელმძღვანელი უნდა იყოს ასევე კვალიფიციური. ქალბატონი თამარ ქალდანი ძალიან კვალიფიციური, პროფესიონალია, რომელმაც შთამბეჭდავი რეფორმები გაატარა ამ სამსახურში“, - განაცხადა ოხანაშვილმა.

მისი თქმით, ამჟამად პერსონალურ მონაცემთა დაცვის ინსპექციის ხელმძღვანელის შესარჩევად კონკურსი მიმდინარეობს და დაახლოებით 30-ზე მეტი განაცხადია შესული.

"რაც შეეხება პროცესს, ახლა მიმდინარეობს კონკურსი. მოხდა უკვე შესაბამისი განაცხადების შემოტანა, საკონკურსო კომისია მათი მუშავებს. შემდგომი ეტაპი არის უკვე გასაუბრება კანდიდატებთან. თუ არ ვცდები, 30-ზე მეტი განაცხადია შემოსული. წინ გვაქვს გასაუბრების ეტაპი და როცა საკონკურსო კომისია გაესაუბრება კანდიდატებს, შემდეგ შეგვეძლება დამატებით ამაზე საუბარი. ძალიან მნივნელოვანი პოზიციაა, რომელსაც კვალიფიციური, გამოცდილი, სანდო ადამიანი სჭირდება", - განაცხადა ოხანაშვილმა.