აშშ-ს სპეცწარმომადგენელმა კურტ ვოლკერმა „ამერიკის ხმის“ ჟურნალისტთან ისაუბრა იმ მოლოდინზე, რაც აშშ-ს აქვს უკრაინისგან, კონკრეტულად ახალი პრეზიდენტის არჩევის შემდეგ. ამ ინტერვიუს მოკლე შინაარსს სააგენტო „უნიანი“ ავრცელებს.

კურტ ვოლკერი აცხადებს, რომ ბოლო კვირებში უკრაინულ პოლიტიკაში სწრაფად განვითარდა მოვლენები და იმაზე მეტი რამ მოხდა, ვიდრე ბოლო ორი წლის განმავლობაში. შესაბამისად, გაქრა ის გარკვეული „მოწყენილობის“ შეგრძნება დასავლეთში უკრაინისგან. მისი აზრით, მნიშვნელოვანია, რომ ეს გრძნობა არ დაეუფლოს თვით უკრაინელებს და არ შეეჩვიონ ოკუპაციას.

არჩევნების თემაზე საუბრისას ვოლკერმა ხაზი გაუსვა, რომ აშშ ევროპისგან განსხვავებით არ გამოხატავდა თავის სიმპატიებს არც ერთი კანდიდატის მიმართ.

„ჩვენ ველოდებით და გვინდა ვიხილოთ შემდგომი რეფორმები და დემოკრატიზაცია უკრაინაში, ღია ეკონომიკა და საერთაშორისო ინვესტიციები. ერთდროულად უნდა მიმდინარეობდეს მონაწილეობა მინსკის პროცესში და უკრაინის სუვერენიტეტისა და ტერიტორიული მთლიანობის აღდგენის მცდელობები“, - განაცხადა აშშ-ის სპეცწარმომადგენელმა.