აფეთქებას ძალიან დიდი ხმა ჰქონდა, მთელი კორპუსი გარეთ გამოცვივდა. იმ ბინაში მაცხოვრებელ ორ ბიჭს თმაზე ცეცხლი ეკიდა, - ამის შესახებ ჟურნალისტებს ოთარ ჭილაძის ქუჩაზე მაცხოვრებელმა დარეჯან გოგოლაძემ განუცხადა.

როგორც ის აღნიშნავს, იმ დროს, როცა ერთ-ერთ ბინაში ბუნებრივი აირი აფეთქდა, სახლში იმყოფებოდა და გარეთ ძლიერი აფეთქების ხმაზე გავიდა.

„ძალიან დიდი ხმა იყო, მთელი ჩარჩოები დაცვივდა. კივილ-წივილი იყო, მთელი კორპუსი გამოცვივდა, გაზი აფეთქდაო. იქ მაცხოვრებელ ორ ბიჭს თმებზე ცეცხლი ეკიდა. მინები ჩამსხვრეულია, ძალიან შეგვეშინდა. გუშინ გაზი გადაკეტეს, ალბათ, გაზი მოშვებული დარჩათ, როცა ჩაირთო, ალბათ ვერ გაიგეს. ყველას მოგვივიდა შეტყობინება, რომ ბუნებრივი აირი შეწყდებოდა, მაგრამ ისინი ქართველები არ იყვნენ და როგორც ჩანს, შეტყობინება ვერ წაიკითხეს- განაცხადა გოგოლაძემ.

შემთხვევის ადგილზე ექსპერტ-კრიმინალისტები მუშაობენ.

აფეთქებაზე განცხადებას „ყაზტრანსგაზიც“ ავრცელებს. კერძოდ, კომპანიის ინფორმაციით, საბურთალოს რაიონში, ჭილაძის ქუჩის ერთ-ერთ საცხოვრებელ ბინაში აფეთქების მიზეზი სავარაუდოდ ღიად დატოვებული გაზქურის ონკანი გახდა.

„აფეთქების შესახებ ინფორმაცია კომპანიის ცხელ ხაზზე შეტყობინება 18:41 წუთზე შემოვიდა. კომპანიის სპეციალისტების მიერ შემთხვევის ადგილის დათვალიერებისას დადგინდა, რომ აღნიშნული კორპუსი გაზის დიდი რაოდენობით დაგროვების გამო ძლიერ აფეთქებას გადაურჩა. მეზობლების განცხადებით აღნიშნული ბინა გაქირავებული იყო. დაშავებულია სამი ადამიანი რომლებსაც მსუბუქი დამწვრობა აღენიშნებათ. დამატებითი დეტალები გამოძიების დასრულების შემდეგ გახდება ცნობილი. კომპანია „ყაზტრანსგაზ-თბილისი“ კიდევ ერთხელ მოგიწოდებთ არ დატოვოთ გაზის ონკანები ღია მგომარეობაში და უყურადღებოდ. ამით საფრთხეს უქმნით, თქვენი ოჯახის წევრების და მეზობლების სიცოცხლეს“, - აღნიშნულია განცხადებაში.

"ბიჭებს თავზე ცეცხლი წაეკიდათ და საავადმყოფოში გაიქცნენ" - თვითმხილველის კომენტარი ჭილაძის ქუჩაზე მომხდარ აფეთქებაზე