ავსტრიის დედაქალაქ ვენაში გარემოსდამცველმა აქტივისტებმა მასშტაბური საპროტესტო აქცია გამართეს. მასში მონაწილეობას 35 000 ადამიანი იღებდა, რომელთა შორის უმეტესობა სკოლის მოსწავლეები იყვნენ. სკოლის მოსწავლეებმა საპროტესტო აქციები, სახელწოდებით „პარასკევი მომავლისათვის“ რამდენიმე თვის წინ დაიწყეს. ისინი ყოველ პარასკევს აცდენენ სკოლას და საპროტესტო აქციაში იღებენ მონაწილეობას. მათ სურთ ხელისუფლებამ მეტი ყურადღება დაუთმოს გარემოს დაცვასა და კლიმატურ ცვლილებებს.
აღსანიშნავია, რომ აქციას ესწრებოდა 16 წლის შვედი გარემოსდამცველი აქტივისტი გრეტა ტუნბერგი, რომელმაც საპროტესტო აქციები სტოკჰოლმში მარტომ დაიწყო, დროთა განმავლობაში კი ათასობით მიმდევარი გამოუჩნდა მთელი ევროპიდან.
სიტყვით გამოსვლისას მან განაცხადა, რომ აქციები კიდევ ძალიან დიდხანს გაგრძელდება, იქამდე, ვიდრე ევროკავშირის ქვეყნების ხელისუფლება მეტ ყურადღებას არ დაუთმობს გარემოს დაცვას. მან ასევე განაცხადა, რომ აპირებს აკადემიური წელი აიღოს სკოლიდან, რათა უფრო აქტიურად გააგრძელოს წამოწყებული საქმე.