ე.წ. ჩემპიონატში აფხაზეთიდან და ცხინვალის რეგიონიდან საფეხბურთო გუნდების მონაწილეობა არ გულისხმობს და ვერ გახდება საოკუპაციო რეჟიმების რაიმე ფორმით ლეგიტიმურობის მოპოვების საფუძველი, - ამის შესახებ საქართველოს საგარეო საქმეთა სამინისტროს წარმომადგენელმა ვლადიმერ კონსტანტინიდმა არაღიარებულ მთიან ყარაბახში მიმდინარე ე.წ. ევროპის საფეხბურთო ჩემპიონატში ოკუპირებული აფხაზეთისა და ცხინვალის საფეხბურთო გუნდების მონაწილეობასთან დაკავშირებით განაცხადა.
საგარეო უწყების წარმომადგენელი განმარტავს, რომ აღნიშნულის ინიციატორი და ორგანიზატორი კონიფააა, რომელიც არაღიარებული რეგიონების საფეხბურთო ასოციაციათა ფედერაციას წარმოადგენს.
„ფიფა და უეფა არ აღიარებენ და კატეგორიულად ემიჯნებიან კონიფა-ს და მსგავს ორგანიზაციებს, რომლებშიც ძირითადად არღიარებული რეჟიმებისა და რეგიონების საფეხბურთო გუნდები არიან წარმოდგენილი.
საერთაშორისო თანამეგობრობის პოზიცია და მხარდაჭერა საქართველოს მიერ წარმოებული არაღიარების პოლიტიკის მიმართულებით არის ურყევი და უცვლელი, რაც არაერთ საერთაშორისო ხასიათის დოკუმენტში და განცხადებაში გამოიხატება. არაღიარების პოლიტიკის განხორციელება წარმოადგენს ჩვენი ქვეყნის მთავარ, ძირითად საგარეო პოლიტიკური მიმართულების პრიორიტეტს. საგარეო საქმეთა სამინისტრო განაგრძობს აქტიურ მუშაობას არაღიარების პოლიტიკის განმტკიცებისა და რისკების შემდგომი პრევენციის მიზნით“,-აცხადებს ვლადიმერ კონსტანტინიდი.