დონალდ ტრამპის სახელმწიფო ვიზიტი ბრიტანეთში გრძელდება

აშშ-ის პრეზიდენტის დონალდ ტრამპის სახელმწიფო ვიზიტი დიდი ბრიტანეთისა და ჩრდილოეთ ირლანდიის გაერთიანებულ სამეფოში გრძელდება. გუშინდელი დღე ძირითადად დაეთმო სახელმწიფო ვიზიტისათვის დამახასიათებელ საზეიმო ღონისძიებებს: მიღება დედოფალ ელისაბედ მეორესთან, ბუკინგემის სასახლის მუზეუმის დათვალიერება.

4 ივნისს დღის წესრიგშია სახელმწიფო ვიზიტის ოფიციალური ნაწილი. შეხვედრა პრემიერ-მინისტრ ტერეზა მეისთან მის რეზიდენციაში დაუნინგ სტრიტზე და გაფართოებული შეხვედრა ტრამპის გუნდის წარმომადგენლებსა და ბრიტანეთის მთავრობის წევრებს შორის. ვიზიტის ძირითადი მიზანია ამბიციური სავაჭრო ხელშეკრულების მომზადება, რომელიც უაღრესად ხელსაყრელი იქნება სტრატეგიული პარტნიორებისათვის ბრიტანეთის ევროკავშირიდან გამოსვლის შემთხვევაში.

5 ივნისს, აშშ -ს პრეზიდენტი ტერეზა მეისთან ერთად ჩავა ინგლისის სამხრეთით მდებარე ქალაქ პორტსმუთში, სადაც დაგეგმილია საზეიმო ღონისძიებები მოკავშირეთა ჯარების ნორმანდიაში გადასხმიდან 75 წლის აღსანიშნავად. ამ ცერემონიაში მონაწილეობას მიიღებენ აგრეთვე საფრანგეთის პრეზიდენტი ემანუელ მაკრონი, გერმანიის კანცლერი ანგელა მერკელი, მსოფლიოს სხვა სახელმწიფოების ლიდერები და მეორე მსოფლიო ომის 300 ვეტერანი. 6 ივნისს ტრამპი და სხვა ლიდერებიც გადაინაცვლებენ საფრანგეთში, სადაც ასევე დაგეგმილია ანალოგიური საზეიმო ღონისძიებები.

დიმიტრი შველიძე -  ხელისუფლების მთავარი თავის ტკივილი „ნაცმოძრაობაა“,  ამ ფონზე, მისთვის შეიძლება უფრო მისაღები იყოს „ევროპული საქართველო“
ქართული პრესის მიმოხილვა 13.08.2020
აგვისტოს ომიდან 12 წლის შემდეგაც საქართველო დგას რუსული აგრესიის წინაშე
Wolt და Mastercard ბათუმში გელიან!