აზიურ ფაროსანასთან ბრძოლის მიზნით, დასავლეთ საქართველოში ფართობების თერმული ნისლით დამუშავება იწყება.

მუდმივი მონიტორინგის შედეგების გათვალისწინებით, მავნებელთან ბრძოლის საკოორდინაციო მართვის ცენტრის მიერ განისაზღვრა პრიორიტეტული სოფლები და ლოკაციები, სადაც, კლიმატური პირობების გათვალისწინებით, ფართობები თერმული ნისლით დამუშავდება. ამის შესახებ ინფორმაციას სურსათის ეროვნული სააგენტო ავრცელებს.

მათივე ინფორმაციით, 5 ივნისს, 21:30 საათზე, თერმული ნისლის ტექნოლოგიით დამუშავდება შემდეგი სოფლები:

გურიის რეგიონი: ლანჩხუთის მუნიციპალიტეტი - სოფელი ქვემო აკეთი;

ჩოხატაურის მუნიციპალიტეტი - სოფელი შუა ამაღლება.

იმერეთის რეგიონი: ზესტაფონის მუნიციპალიტეტი - სოფელი როდინაული; სამეგრელოს რეგიონი: აბაშის მუნიციპალიტეტი - სოფლები კეთილარი და სუჯუნა; ზუგდიდის მუნიციპალიტეტი - სოფლები: ერგეტა, ორულუ და ცვანე.

„მოსახლეობის ინფორმირების პროცესში ჩართულნი არიან ადგილობრივი თვითმმართველობების წარმომადგენლები. ღონისძიებები მეფუტკრეების ინტერესების გათვალისწინებითა და მათთან კოორდინირებულად დაიგეგმება, რათა არ დაზიანდეს ფუტკარი.

მავნებლის წინააღმდეგ თერმული ნისლით წამლობა აზიური ფაროსანას გამოსაზამთრებელ ფაზაში გადასვლამდე გაგრძელდება.

ღონისძიებების პარალელურად გრძელდება აქტიური მონიტორინგი, რომლის შედეგებიც აზიურ ფაროსანასთან ბრძოლის საკოორდინაციო ცენტრის ელექტრონულ ბაზაში აისახება. მონაცემების ინტერაქტიულ რუკაზე ასახვა და განახლება ყოველდღიურად მიმდინარეობს. მონაცემთა ანალიზის საფუძველზე იგეგმება შეწამვლითი ღონისძიებები.

დაინტერესებულ პირებს შესაძლებლობა აქვთ გაიარონ SMS რეგისტრაცია და გზავნილების მეშვეობით ან საკოორდინაციო მართვის ცენტრის ოფიციალურ ვებგვერდზე: www.parosana.ge, მიიღონ დეტალური ინფორმაცია ღონისძიებების დაწყებისა და განხორციელების ვადების შესახებ“, - ნათქვამია ინფორმაციაში.