მიხეილ კალანდია წარდგენილ ბრალში თავს დამნაშავედ არ ცნობს, - ამის შესახებ ჟურნალისტებთან საუბრისას დავით სარალიძის მკვლელობის ბრალდებით დაკავებული მიხეილ კალანდიას ადვოკატმა, ანა კოტეტიშვილმა განაცხადა.

კოტეტიშვილი შსს მინისტრის მოადგილე ნათია მეზვრიშვილის მიერ გაკეთებულ განცხადებასაც გამოეხმაურა, რომელშიც მეზვრიშვილი აცხადებს, რომ დაკავებამდე მიხეილ კალანდია მიმალვას ცდილობდა.

"სრული პასუხისმგებლობით მინდა განვაცხადო, რომ ამ ფაქტს კატეგორიულად უარვყოფ. წინა დღეს, სანამ მიხეილ კალანდიას დააკავებდნენ, ოჯახთან ვისაუბრეთ, რომ პროცესი იყო და მიხეილ კალანდია მოწმის სტატუსით უნდა დაკითხულიყო. 10 საათიდან ისინი ჩემთან სატელეფონო კონტაქტზე იყვნენ, თუ როგორ გამოდიოდნენ სახლიდან მიხეილთან ერთად და ნახევარი საათის შემდეგ მაცნობეს, რომ ის დააკავეს," - განაცხადა ანა კოტეტიშვილმა.

შეგახსენებთ, რომ შსს-ს ინფორმაციით, კალანდია ხორავას ქუჩაზე დავით სარალიძის ჯგუფურად დამამძიმებელ გარემოებებში ჩადენილი მკვლელობის ბრალდებით დააკავეს.