დარწმუნებული ვარ, მთაწმინდის ამომრჩეველს არჩევანის გაკეთება არ გაუჭირდება - ლადო კახაძეს საპარლამენტო ცხოვრების გამდიდრება შეუძლია, რაც შეეხება მის კონკურენტს შალვა შავგულიძეს, კრიტიკას ვერ უძლებს, - აღნიშნული განცხადება ჟურნალისტებთან საუბრისას პარლამენტის თავმჯდომარემ ირაკლი კობახიძემ გააკეთა.
მისი თქმით, ლადო კახაძე იქნება სიახლე საქართველოს პარლამენტში.
„ის არის გამორჩეული თვისებების მქონე ადამიანი, რომელიც პარლამენტს გაამდიდრებს. სამწუხაროდ, სიძულვილით და აგრესიით არის გამორჩეული ჩვენი პოლიტიკური ცხოვრება, მათ შორის საპარლამენტო ცხოვრება. ლადო კახაძეს პარლამენტში ამის საპირისპირო პრაქტიკის შემოტანა შეუძლია. მას შეუძლია საპარლამენტო ცხოვრების გამდიდრება. შესაბამისად, ამომრჩეველს მოვუწოდებ, რომ არჩევანი ლადო კახაძის სასარგებლოდ გააკეთოს. რაც შეეხება მის კონკურენტს შალვა შავგულიძეს, კრიტიკას ვერ უძლებს მისი განცხადებები, განსაკუთრებით ბოლო დროის განმავლობაში გაკეთებული. შალვა შავგულიძეს საზოგადოება იცნობდა როგორც გირგვლიანის საქმის ადვოკატს და ახლა პრაქტიკულად საკუთარი როლი მთლიანად შეატრიალა, რაც არის აბსოლუტურად წარმოუდგენელი და მიუღებელი“, - განაცხადა ირაკლი კობახიძემ.
9 ივნისის მთაწმინდის საარჩევნო ოლქში პარლამენტის შუალედური არჩევნები გაიმართება, სადაც ერთმანეთს ლადო კახაძე და შალვა შავგულიძე უპირისპირდება.