თუკი დივერსიაა განხორციელებული, რასაკვირველია, ეს დივერსია არის ხელისუფლების წინააღმდეგ, - ასე აფასებს პარლამენტის ვიცე-სპიკერი გია ვოლსკი, ლილოში გაჩენილ ხანძარს. მმართველი პარტიის დეპუტატის თქმით, მსგავსი შემთხვევები წინასაარჩევნოდ აწყობთ იმ ადამიანებს, რომლებიც ხელისუფლებას უპირისპირდებიან, ვინაიდან ასეთ შემთხვევაში მისი თქმით, მარტივია ხელისუფლების კრიტიკა.
„ხანძარი საშინელებაა და იმ ხალხმა ვინც გარკვეული ზარალი განიცადა, ეს ძალიან მძიმეა. თუკი დივერსიაა განხორციელებული, რასაკვირველია დივერსია არის ხელისუფლების წინააღმდეგ, ეს ვისაც არ უნდა გაეკეთებინა. ხელისუფლება ყველაზე უფრო ადვილად გასაკრიტიკებელი ობიექტია და რასაკვირველია, ერთადერთი, ვისაც ეს შეიძლება აწყობდეს, ასეთ სკანდალურ ვითარებაში მითუმეტეს, არჩევნების წინ, ესენი არიან ადამიანები, ვინც ხელისუფლებას ებრძვის, მათ შორის ასეთი დაუშვებელი მეთოდებით. მაგრამ არ ვფიქრობ, რომ დივერსია პოლიტიკური ოპონენტების მხრიდან შეიძლება განხორციელდეს. მე ამასთან დაკავშირებით რეალურ სურათს ვხატავ, რაც მოხდა თუ რაოდენ დამაზიანებელია ეს ხელისუფლებისთვის. გადავხედოთ იმ ხალხის წრეს, ვისაც შეიძლება ეს აწყობდეს“, - განაცხადა ვოლკსიმ.