ჩვენ ვაპირებთ მივმართოთ საქართველოს პარლამენტს მოთხოვნით, შეიქმნას მოკვლევის ჯგუფი, რომელიც დაადგენს, ყოველწლიურად ხმარდება თუ არა დაახლოებით 350-400 მილიონი ლარი ბიუჯეტიდან „ქართული ოცნების“ ჩინოვნიკებს, - ამის შესახებ, დღეს გამართულ ბრიფინგზე "ევროპული საქართველოს" წევრმა, დეპუტატმა ირაკლი აბესაძემ განაცხადა.
"როდესაც ვსაუბრობთ ბიუჯეტის ხარჯზე, „ქართული ოცნების“ აქტივისტების დასაქმებაზე, საქმე გვაქვს ძალიან სისტემურ და კარგად ორგანიზებულ კორუფციულ დანაშაულთან. ვგულისხმობ ასეულობით მილიონი ლარის მოხმარებას ბიუჯეტიდან „ქართული ოცნების" აქტივისტებზე. ამას ადასტურებს პრემიერ-მინისტრისა და ფინანსთა მინისტრის მხრიდან კანონმდებლობის უხეში დარღვევა, უარის თქმა დეპუტატებისთვის, რომ მათ იცოდნენ რამდენი ასეული მილიონი ლარი იხარჯება თვითმმართველობის ა(ა)იპ-ებში შრომით ანაზღურებაზე", - განაცხადა აბესაძემ.
მისივე თქმით, ფინანსთა მინისტრი და პრემიერ-მინისტრი ინფორმაციას მალავენ.
" სწორედ ამიტომ, ჩვენ ვაპირებთ მივმართოთ საქართველოს პარლამენტს, შეიქმნას მოკვლევის ჯგუფი, ვინაიდან ეს არის სისხლის სამართლის დანაშაული. მოკვლევის მოთხოვნასთნ ერთად, მისი შედეგებიდან გამომდინარე აუცილებლად მივმართავთ საქართველოს პროკურატურასაც, გამოიძონ, რატომ არსებობს ქვეყანაში ფორმალურად ორგანიზაციები, სადაც დასაქმებული პირები არ მუშაობენ, მათ "ქართული ოცნება" იყენებს პარტიული მიზნებისთვის, ხოლო ხელფასს იღებენ ბიუჯეტიდან, გადასახადების გადამხდელების ხარჯზე," - განაცხადა ირაკლი აბესაძემ.