მე კარგი ადვოკატიც ვარ, თუ დაგჭირდათ მომიწვიეთ და შეიძლება დაგჭირდეთ, ასე თუ დამალავთ რაღაცებს, - ასე უპასუხა ფრაქცია „ნაციონალური მოძრაობის“ თავმჯდომარე რომან გოცირიძემ ეკონომიკის მინისტრ ნათია თურნავას, მას შემდეგ, რაც ეკონომიკის მინისტრმა დეპუტატს შემდეგი რეპლიკით მიმართა: ბატონო რომან, თუ გამომიჩნდება შიდა აუდიტორის ვაკანსია, აუცილებლად, სიამოვნებით მოგიწვევთ. ძალიან კარგი პოტენციალი გაქვთ, როგორც ვატყობ და შემართება.

თურნავასა და გოცირიძეს შორის აღნიშნული საუბარი „ნაციონალური მოძრაობის“ თავმჯდომარის შეკითხვას მოჰყვა იმის შესახებ, იცოდა თუ არა ნათია თურნავას მოადგილემ, გენადი არველაძემ ფოთის პორტის მშენებლობის ნებართვასთან დაკავშირებით არსებული დოკუმენტაციის შესახებ.

ეკონომიკის მინისტრს დარგობრივი ეკონომიკისა და ეკონომიკური პოლიტიკის კომიტეტის სხდომაზე უკვე რამდენიმე საათია უსმენენ.