იუსტიციის უმაღლეს საბჭოს სხდომაზე უზენაესი სასამართლოს მოსამართლეობის მსურველების კანდიდატებად რეგისტრაციაზე მსჯელობენ.

სხდომა დაწყებისთანავე საბჭოს მდივანმა, გიორგი მიქაუტაძემ დატოვა, ვინაიდან ის უზენაეს სასამართლოში მოსამართლეობის მსურველთა 144-კაციან სიაშია.

მის ნაცვლად სხდომას იუსტიციის უმაღლესი საბჭოს წევრი დიმიტრი გვრიტიშვილი უძღვება.

საბჭო სიაში წარმოდგენილი 144 პირიდან კანდიდატებს აირჩევს, რომლებიც აკმაყოფილებენ ნორმებს.

დიმიტრი გვრიტიშვილის თქმით, საბჭო იმ ცალკეულ, კონკრეტულ კანდიდატებს განიხილავს, რომელთაც საბჭოს წევრების მოსაზრებით, სავარაუდოდ, აპლიკაციის შევსებისას ხარვეზი აქვთ. კენჭისყრაზე ბოლოს, ცალ-ცალკე პირებს, ვინც საბჭოს წევრების აზრით, კანდიდატად დარეგისტრირების პროცესიდან გამორიცხული უნდა იყვნენ, კენჭი ეყრებათ, ხოლო დანარჩენ პირებზე ჩაითვლება, რომ მათ მიმართ იუსტიციის უმაღლესი საბჭოს წევრებს პრეტენზიები არ აქვთ.

აღნიშნული პროცედურის შემდეგ, განმცხადებლებს, რომლებსაც უარი ეთქვათ რეგისტაციაზე, ექნებათ ორი სამუშაო დღე იმისთვის, რომ საბჭოს უარი გაასაჩივრონ.

შემდეგ კი საბჭო 50-კაციან სიაზე დაიწყებს მუშაობას.