მერწმუნეთ, ძალიან მალე დადგება დრო, როდესაც წყლის შეწყვეტა იშვიათი მოვლენა გახდება ჩვენს ქალაქში, - ამის შესახებ „ჯორჯიან უოთერ ენდ ფაუერის” კომუნიკაციების დირექტორმა ეკა ბერიძემ წყლის მიწოდებასთან დაკავშირებით შეზღუდვების თაობაზე საუბრისას განაცხადა.
მისი თქმით, წყლის მიწოდებასთან დაკავშირებული შეზღუდვები წელს ძირითადად სარეაბილიტაციო სამუშაოებს უკავშირდება.
„წყლის ხშირი წყვეტა სხვადასხვა მიზეზს უკავშირდება. წელს უფრო მეტად ეს რეაბილიტაციებთან არის დაკავშირებული. სწორედ ისეთ ქუჩებზე, სადაც ხშირ შემთხვევაში ხდება ავარია, მილებს ვცვლით. ეს ჩვენი ინტენსიური პროგრამა რამდენიმე წლის განმავლობაში გაგრძელდება. არსებობს მილის ავარიული დაზიანებები, რაც ხდება მოულოდნელად. ზოგჯერ, როცა წყლის შეწყვეტის თაობაზე, მესიჯი არ მოგდით, ეს ალბათ დაკავშირებულია იმასთან, რომ წყლის დაკეტვის საჭიროება ძალიან სწრაფად დადგა და ამიტომ ვერ მოვასწარით საზოგადოების ინფორმირება. ამასთან, მინდა დაგარწმუნოთ, სწორედ იმიტომ შემოვიღეთ სმს სერვისი, რომ ჩვენი მომხმარებელი წინასწარ გავაფრთხილოთ მოსალოდნელი სამუშაოს შესახებ.
მერწმუნეთ, ძალიან მალე დადგება დრო, როდესაც ეს იშვიათი მოვლენა გახდება, ყოველ შემთხვევაში ჩვენს ქალაქში," - აღნიშნა ეკა ბერიძემ.