„საქართველოს მელიორაციის” გენერალური დირექტორი კახეთის რეგიონში  სამელიორაციო სისტემებზე მიმდინარე სამუშაოებს გაეცნო

გარემოს დაცვისა და სოფლის მეურნეობის სამინისტროს შპს „საქართველოს მელიორაციის” გენერალური დირექტორი კახეთის რეგიონში სამელიორაციო სისტემებზე მიმდინარე სამუშაოებს გაეცნო.

როგორც „ინტერპრესნიუსს“ გარემოს დაცვისა და სოფლის მეურნეობის სამინისტროდან აცნობეს, შპს „საქართველოს მელიორაციის” გენერალურმა დირექტორმა ოთარ შამუგიამ სიღნაღის მუნიციპალიტეტში ქვემო ალაზნის სარწყავი სისტემა დაათვალიერა, სადაც მაგისტრალური არხის მონაკვეთებისა და მასზე არსებული ჰიდროტექნიკური ნაგებობების რეაბილიტაცია მიმდინარეობს. ჩატარებული სამუშაოები მუნიციპალიტეტში 9 300 ჰექტარ სასოფლო-სამეურნეო მიწის ფართობზე სარწყავი წყლის მიწოდებას გააუმჯობესებს. გურჯაანის მუნიციპალიტეტში ამავე სისტემის წყალგამანაწილებლებზე 28-კილომეტრიანი მონაკვეთის რეაბილიტაცია და 15-კილომეტრიანი ღია სისტემის დახურულ ქსელში მოქცევის სამუშაოები მიმდინარეობს. შედეგად, სოფლების ჩუმლაყისა და ყიტაანის 1 330 ჰექტარ სავარგულზე წყლის მიწოდების რეჟიმი გაუმჯობესდება.

აღდგენითი სამუშაოები უტარდება, ასევე, ვაქირის სანიაღვრე კოლექტორს. ბუჩქნარისა და ნატანი მასისგან 9 კილომეტრი სიგრძის არხი იწმინდება. აღნიშნული სამუშაოები უხვი ნალექის დროს მიმდებარე სახნავ-სათესი სავარგულებისა და შიდასასოფლო გზების დატბორვისგან დაცვას უზრუნველყოფს.

„საქართველოს მელიორაცია“ დღეისათვის კახეთში სამელიორაციო ინფრასტრუქტურის სარეაბილიტაციო 12 პროექტს ახორციელებს, რომელთა დასრულების შემდეგ, დამატებით 1 830 ჰექტარი სასოფლო-სამეურნეო მიწის ფართობი მოირწყვება, სარწყავი წყლის მიწოდება 9 500 ჰექტარ სავარგულზე გაუმჯობესდება, ხოლო დრენირებული ფართობი 3 000 ჰექტარი იქნება.

ალექსანდრე თვალჭრელიძე - „ქართული ოცნების“ ეკონომიკური პროგრამა გაცილებით უფრო მოკრძალებული, მაგრამ, ამავდროულად, გაცილებით უფრო რეალისტურია
ქართული პრესის მიმოხილვა 21.09.2020
რევაზ კოპალაძე - ქვეყნებში, სადაც გულშემატკივრობენ საქართველოს, მტკივნეულად აღიქვამენ სახელმწიფოს ჩარევას „კავკასუს ონლაინის“ სამეწარმეო თავისუფლებაში