ეროვნული ბანკის კომპეტენცია, ძირითადად, ორი მიმართულებით, განისაზღვრება - ფასების სტაბილურობა და ფინანსური მდგრადობა. ორივე მიმართულებით გასული 2018 წელი შეიძლება წარმატებულად ჩაითვალოს, - განაცხადა საფინანსო-საბიუჯეტო კომიტეტის თავმჯდომარემ, ირაკლი კოვზანაძემ ეროვნული ბანკის პრეზიდენტის, კობა გვენეტაძის ეროვნული ბანკის 2018 წლის წლიური ანგარიშის წარდგენისას.

როგორც ირაკლი კოვზანაძემ აღნიშნა, გასულ წელს ინფლაცია მიზნობრივი მაჩვენებლის ფარგლებში იყო, საფინანსო ბაზარი კი ინარჩუნებდა ლიკვიდობისა და გადახდისუნარიანობის მაღალ დონეს, რაც, პირველ რიგში, საბანკო სისტემას ეხება. ამავე დროს, 2018 წელს გატარდა მთელი რიგი ღონისძიებები და ამოქმედდა ახალი რეგულაციები არასაბანკო საკრედიტო დაწესებულებების საქმიანობის მოწესრიგების მიმართულებითაც.

„ჩემი აზრით, თამამად შეიძლება ითქვას, რომ 2018 წელს ეროვნული ბანკის ფულად-საკრედიტო, ანუ, მონეტარული და საზედამხედველო პოლიტიკა ადეკვატური და წარმატებული იყო“, - განაცხადა საფინანსო-საბიუჯეტო კომიტეტის თავმჯდომარემ.

ინფორმაციას პარლამენტი ავრცელებს.