ეკონომიკის ყოფილი მინისტრი, გიორგი ქობულია არ გამორიცხავს, რომ პოლიტიკაში დაბრუნდეს. ამის შესახებ მან „პალიტრანიუსის“ გადაცემა „360 გრადუსში“ განაცხადა, რითაც თავის სამომავლო გეგმებზე დასმულ კითხვას უპასუხა.

როგორც ეკონომიკის ყოფილმა მინისტრმა აღნიშნა, მისი სურვილია, რომ თავისი ქვეყნის საკეთილდღეოდ, უფრო დიდი კვალი დატვოს.

„არ არის გამორიცხული, ჩემი სამომავლო გეგმები პოლიტიკასაც დავუკავშირო. რა თქმა უნდა, ჩემი ძალიან დიდი სურვილია, რომ უფრო დიდი კვალი დავტოვო ჩემი ქვეყნის საკეთილდღეოდ. მე მაქვს ასეთი ამბიცია და მოხარული ვიქნებოდი, რომ ეს გავაკეთო. რა თქმა უნდა, ამასთან დაკავშირებით მაქვს რამდენიმე შეზღუდვა, რაც პირადულია, მაგრამ ეს არის ერთ-ერთი საკითხი, რომელსაც სამომავლოდ განვიხილავ“, - განაცხადა ქობულიამ.

წამყვანის კითხვაზე, არის თუ არა საქართველოში უკვე ჩამოყალიბებული ისეთი პოლიტიკური ძალა, სადაც საკუთარ თავს ხედავს, ქობულიამ უპასუხა, რომ ჯერ არ გადაუწყვეტია და ურჩევნია, ამ ეტაპზე ამ საკითხზე არ ისაუბროს.

„ამაზე ამ ეტაპზე მირჩევნია არ ვისაუბრო. ჯერ არ გადამიწყვეტია, 2020 წლის საპარლამენტო არჩევნებისთვის ვხედავ თუ არა საკუთარ პოლიტიკურ მომავალს“, - აღნიშნა ყოფილმა მინისტრმა.