დავით ზალკალიანი - მთავრობა ყველაფერს აკეთებს იმისთვის, რომ ხელი შეუწყოს კონსორციუმს ანაკლიის პროექტის განვითარებაში

საქართველოს საგარეო საქმეთა მინისტრის, დავით ზალკალიანის განცხადებით, საქართველოს ხელისუფლებას აქვს მაღალი პოლიტიკური ნება განხორციელდეს ანაკლიის პროექტი და ეს საგარეო პოლიტიკის სტატეგიაშიც აისახა.

როგორც ზალკალიანმა ანაკლიის პორტთან დაკავშირებით, ვაშინგტონში, ჟურნალისტების მიერ დასმული შეკითხვის საპასუხოდ განაცხადა, საქართველოს მთავრობა მუდმივად ადასტურებდა ანაკლიის ღრმაწყლოვანი პორტის განსაკუთრებულ მნიშვნელობას, ამიტომ პროექტი აუცილებლად განხორციელდება.

„ჩვენთვის უაღრესად მნიშვნელოვანია გეოსტრატეგიულად მნიშვნელოვანი ინფრასტრუქტურული პროექტების განხორციელება საქართველოს ტერიტორიიდან. თავად საქართველოს გეოპოლიტიკური მდებარეობა გვკარნახობს ამას და ამ მიმართულებით ჩვენ კონკრეტულ ნაბიჯებს ვდგამთ და კონკრეტული შედეგების დემონსტრირებაც ხდება. ის ნავთობსადენები და გაზსადენი, რომელიც საქართველოს ტერიტორიაზე გადის, ასევე პორტების ინფრასტრუქტურის განვითარება ადასტურებს ამას. საქართველოს მთავრობა ჩართულია ამ პროცესებში და ყველაფერს აკეთებს იმისთვის, რომ ხელი შეუწყოს კონსორციუმს ანაკლიის პროექტის განვითარებაში. ეს პროექტი მუდმივად მიგვაქვს საერთაშორისო თანამეგობრობის ყურამდე, მათ შორის ევროკავშირის და აშშ-ს. თუნდაც ის ფაქტი, რომ ევროკავშირის უმაღლესი დონის შეხვედრაზე საქართველოს ხელისუფლება წამოწია ეს და სხვა მნიშვნელოვანი ინფრასტრუქტურული პროექტები და ჩვენ ასევე ამერიკის შეერთებულ შტატებთან, ჩვენს მთავარ პარტნიორთან ვსაუბრობთ ამაზე, სწორედ სახელმწიფოს უდიდესი ინტერესის დასტურია“, -განაცხადა ზალკალიანმა.