ხელისუფლების წამომადგენლების ეჭვები ანაკლიის პორტის კომერციული მომგებიანობის შესახებ არის შენიღბული ობსტრუქცია პროექტის მიმართ - იმედია, ამერიკის შეერთებული შტატების სახელმწიფო მდივნის მკაცრი განცხადება ანაკლიის პროექტის მტრებს გონს მოიყვანს, - ამის შესახებ “ინტერპრესნიუსს“ ფრაქცია “ნაციონალური მოძრაობის“ თავმჯდომარემ რომან გოცირიძემ განუცხადა.
დეპუტატის შეფასებით, თუკი რაიმე კომერციული რისკებია, ეს არის პირდაპირ ხელისუფლების ბრალი.
“შვიდი წელია ვერ მოაბეს თავი - ჯერ ავღანეთიდან ამერიკული ჯარებისა და სამხედრო ტექნიკის გაყვანის პროცესს გამოვაკლდით, ახლა ჩინური ტვირთებიც რუსეთისა და სხვა მიმართულებით ინაცვლებს ნავსადგურის მშენებლობის გაჭიანურების გამო. მიუხედავად ყველაფრისა, ანაკლიის ნავსადგური არის სიცოცხლისუნარიანი და კომერციულად მეტად მიმზიდველი და შეწყვიტონ პარლამენტსა და მთავრობაში მისი ფარული დისკრედიტაცია. მოტივები პოლიტიკური და კორუფციულია. ცალკეული გამონათქვამები შეიძლება არაკომპეტენტურობასაც მივაწეროთ, მაგრამ ეს არაა მთავარი. მთავარი მესიჯები მინისტრებიდან მოდის და ესაა საგანგაშო. იმედია, ამერიკის შეერთებული შტატების სახელმწიფო მდივნის მკაცრი განცხადება გონს მოიყვანს ანაკლიის პროექტის მტრებს“, - განაცხადა რომან გოცირიძემ.