ლაშა დარსალიამ საქართველოში გაერო-ს მოსახლეობის ფონდის ოფისის საქმიანობის 20 წლის იუბილესადმი მიძღვნილ ღონისძიებაში მიიღო მონაწილეობა

საქართველოს საგარეო საქმეთა მინისტრის მოადგილემ ლაშა დარსალიამ მონაწილეობა მიიღო საქართველოში გაერო-ს მოსახლეობის ფონდის (UNFPA) ოფისის საქმიანობის 20 წლის იუბილესადმი მიძღვნილ საზეიმო ღონისძიებაში, - ამის შესახებ „ინტერპრესნიუსს“ საგარეო საქმეთა სამინისტროდან აცნობეს.

მათივე ინფორმაციით, ლაშა დარსალიამ ღონისძიებაზე დამსწრე საზოგადოებას სიტყვით მიმართა. მან საქართველოში გაერო-ს მოსახლეობის ფონდის (UNFPA) ოფისის ნაყოფიერ საქმიანობაზე გაამახვილა ყურადღება და აღნიშნა ფონდის განსაკუთრებული როლი ქვეყნის მდგრადი განვითარების საქმეში.

„ფონდს, მნიშვნელოვანი წვლილი შეაქვს ქვეყანაში მდგრადი განვითარების შესაბამისი მიზნების განხორციელების მიმართულებით, რათა შევძლოთ საერთაშორისო თანამეგობრობის მიერ 4 წლის წინ აღებული ვალდებულების შესრულება - “არავინ დარჩეს განვითარების მიღმა”.“-აღნიშნა ლაშა დარსალიამ.

მინისტრის მოადგილემ ხაზი გაუსვა ფონდის მიერ საქართველოში განხორციელებული პროექტების მნიშვნელობას. ამ მხრივ აღინიშნა ჯანდაცვის, რეპროდუქციული ჯანმრთელობის, გენდერული თანასწორობის, ოჯახში ძალადობის პრევენციისა და აღმოფხვრის, და ახალგაზრდული პოლიტიკის განვითარების მიმართულებებით რეალიზებული პროექტები.

ამასთან, სიტყვით გამოსვლისას მინისტრის მოადგილემ ხაზგასმით აღნიშნა გაერო-ს მოსახლეობის ფონდის საქმიანობის მნიშვნელობა 2008 წლის რუსეთ-საქართველოს ომის და მის შემდგომ პერიოდში იძულებით გადაადგილებულ ქალთათვის კრიტიკულად მნიშვნელოვანი სერვისების მიწოდების თვალსაზრისით.

ლაშა დარსალიამ წარმატებები უსურვა ოფისს სამომავლო საქმიანობაში და დაადასტურა არსებული თანამშრომლობის ხელშეწყობის კიდევ უფრო გაღრმავების მზაობა.