ევროკავშირის გადაწყვეტილებით, შრომის ბაზრის ახალი სააგენტო, რომელმაც მუშაობა სექტემბრიდან უნდა დაიწყოს, სლოვაკეთის დედაქალაქ ბრატისლავაში განთავსდება. ევროკავშირის კომისარმა დასაქმების საკითხებში მარიანა ტისენმა ამ გადაწყვეტილების გამოცხადებისას აღნიშნა, რომ ახალ სააგენტოს ორი ძირითადი ამოცანა ექნება: 1) ევროკავშირის შრომის კანონები უნდა იყოს სამართლიანი და ეფექტურად გამოსაყენებელი; 2) ბრძოლა დარღვევებთან.

ევროკავშირის ახალი წევრები ცენტრალური ევროპიდან ხშირად გამოთქვამდნენ პროტესტს იმის გამო, რომ ყველა მნიშვნელოვანი სააგენტო ძირითადად დასავლეთ ევროპაშია განთავსებული. ევროკავშირმა ცოტა ხნის წინ „ბრექსიტის“ გამო გადაწყვიტა საბანკო ზედამხედველობის და წამლების სააგენტოები გადაეტანა შესაბამისად პარიზში და ამსტერდამში. პოლონეთშია სასაზღვრო სააგენტო „ფრონტექსი“.