აკაკი საღირაშვილმა საერთაშორისო ლოგისტიკური კონფერენცია გახსნა

ეკონომიკისა და მდგრადი განვითარების მინისტრის მოადგილე აკაკი საღირაშვილმა საერთაშორისო ლოგისტიკური კონფერენციის ოფიციალურ გახსნაში მიიღო მონაწილეობა, რომელიც გლობალური ორგანიზაციის CGLI - ისა და ქართული კომპანიის „ჯორჯიან ლოგისტიკ გრუფის“ ორგანიზებით გაიმართა.

როგორც „ინტერპრესნიუსს“ ეკონომიკისა და მდგრადი განვითარების სამინისტროდან აცნობეს, კონფერენციას 100-ზე მეტი ქვეყნის 150-მდე დელეგატი ესწრება, რომლებიც გადამზიდავ და ლოგისტიკურ სექტორს წარმოადგენენ.

მათივე ცნობით, მისასალმებელ სიტყვაში, ეკონომიკისა და მდგრადი განვითარების მინისტრის მოადგილემ აკაკი საღირაშვილმა კონფერენციის მონაწილეებს გააცნო სამთავრობო ხედვა სატრანსპორტო - ლოგისტიკური სექტორის განვითარების მიმართულებით, აგრეთვე ყურადღება გაამახვილა ქვეყნის ხელსაყრელ მდებარეობაზე ევროპასა და აზიას შორის, რომელიც იძლევა გადამზიდავი და ლოგისტიკური ბიზნესის განვითარების კარგ შესაძლებლობას.

უწყების ინფორმაციით, მინისტრის მოადგილემ ასევე ისაუბრა მსხვილ ინფრასტრუქტურულ პროექტებზე (ანაკლიის ღრმაწყლოვანი პორტი, რკინიგზის მოდერნიზაციის პროექტი, აღმოსავლეთ - დასავლეთის მაგისტრალი და ა.შ.), რომელთა ამოქმედებაც მნიშვნელოვნად შეუწყობს ხელს საქართველოს ბაზარზე საერთაშორისო გადამზიდავი კომპანიების შემოსვლას და ლოგისტიკურ ინფრასტრუქტურაში კი დამატებითი კაპიტალის მოზიდვას. აკაკი საღირაშვილმა აქცენტი გააკეთა საქართველოზე გამავალ შუა სატრანსპორტო კორიდორსა და მისი განვითარებისთვის მიღებულ გადაწყვეტილებებზე.

„ჩვენ აქტიურად ვმუშაობთ შუა კორიდორის პოპულარიზებასა და მიმდინარე და დაგეგმილი ინფრასტრუქტურული პროექტების განხორციელებისთვის. ჩვენი მიზანია საქართველო რეგიონის ჰაბად ვაქციოთ. ასეთი მაღალი რანგის კონფერენციების ჩატარება გაზრდის როგორც ჩვენი ქვეყნისა და რეგიონის, ასევე შუა კორიდორის ცნობადობას საერთაშორისო გადამზიდავ და ლოგისტიკურ კომპანიებს შორის,“ - განაცხადა ეკონომიკისა და მდგრადი განვითარების მინისტრის მოადგილემ აკაკი საღირაშვილმა.

“ჩვენთვის ძალიან საინტერესოა ქვეყანაში, კავკასიის რეგიონში და მთლიანად შავი ზღვის ქვეყნებში არსებული ვითარების უკეთ შესწავლა. მე წარმოვადგენ CGLI ქსელს, რომელსაც 100 მეტ ქვეყანაში აქვს წარმომადგენლობა. დარწმუნებული ვარ, კონფერენციის შემდეგ კიდევ უფრო მეტი ჩვენი წარმომადგენელი ეწვევა საქართველოს. ქვეყანაში მიმდინარე ინფრასტრუქტურული პროექტები არსებულ შესაძლებლობებს გააორმაგებს და როგორც გადამზიდი კომპანიის წარმომადგენელმა, შემიძლია გითხრათ, რომ ჩვენი ინტერესი ამ ქვეყანაში დიდია. ჩვენ ვხედავთ იმ შესაძლებლობებს, რომელსაც ქვეყანა ახლა ავითარებს და ასევე ნათლად ვხედავთ ამ შესაძლებლობების გამოყენებით მიღწეულ პროგრესს,“ - განაცხადა კონფერენციის ორგანიზატორი ქსელის GCLI - ის მმართველმა დირექტორმა, რაიმონდ ვან ახტერენმა.

კონფერენცია საქართველოში მიმდინარე კვირის ბოლომდე გაგრძელდება. მის მონაწილეებს შესაძლებლობა ექნებათ, უკეთ გაიცნონ საქართველოს ლოგისტიკური ინფრასტრუქტურა. კონფერენციის ფარგლებში ასევე დაგეგმილია B2B შეხვედრები.

რამაზ საყვარელიძე - ქართულ პოლიტიკაში უშინაარსობა უნდა დამთავრდეს, თორემ ერთფეროვნებაში, როცა არც პურია და არც სანახაობა, კიდევ უფრო გაიზრდება პოლიტიკური ნიჰილიზმი
ქართული პრესის მიმოხილვა 21.09.2019
„სოფლად ცხოვრება, როგორც ტურისტული პროდუქტი” - რა იგეგმება ბათუმში 20-21 სექტემბერს?
გერმანიის ფრეზენიუსის ინსტიტუტის ლაბორატორიის  დასკვნით მარნეულის სასურსათო ქარხნის წარმოების ტრადიციულ წითელ ტყემალში სუდანის ჯგუფის საღებავები არ აღმოჩნდა (R)
„ვისოლმა“ თვითმომსახურების პირველი ავტოგასამართი სადგური გახსნა
"ჩიპოლინო" – ევროპული საბავშვო აქსესუარები "ავერსის" ქსელში
დღეიდან, ლიბერთის ბარათით Apple Pay-ს საშუალებით გადახდისას ლიბერთის მომხმარებელი 5%-იან ქეშბექს მიიღებს
"ბაზისბანკის" შვილობილი კომპანია „ბი ეიჩ ელ ლიზინგი’’ მომხმარებელს ბაზარზე საუკეთესო პირობებს სთავაზობს