განათლების, მეცნიერების, კულტურისა და სპორტის მინისტრის პირველი მოადგილე მიხეილ გიორგაძე, მოადგილე შალვა გოგოლაძე და სპორტის განვითარების დეპარტამენტის უფროსი ირაკლი დოლაბერიძე საერთაშორისო ტურნირიდან წარმატებით დაბრუნებულ ახალგაზრდა მოცურავეებსა და მწვრთნელებს შეხვდნენ.
როგორც „ინტერპრესნიუსს“ განათლების, მეცნიერების, კულტურისა და სპორტის სამინისტროს პრესსამსახურიდან აცნობეს, მინისტრის მოადგილეებმა მწვრთნელებისგან ტურნირის შესახებ დეტალური ინფორმაცია მოისმინეს და სამომავლო გეგმებზე ისაუბრეს. სინქრონულად მოცურავეები ახალი პროგრამის განხორციელებას დაიწყებენ, რომლის მიზანიც 2024 წლის პარიზის ზაფხულის ოლიმპიურ თამაშებზე ქართველი მოცურავეების მხრიდან ლიცენზიების მოპოვებაა.
4-6 ივნისს, ლატვიის დედაქლაქ რიგაში ღია პირველობა ჩატარდა სინქრონულ ცურვაში – „ლატვიის თასი“, რომელშიც მონაწილეობას იღებდნენ 10 ქვეყნის წარმომადგენლები, ხუთ ასაკობრივ ჯგუფში.
შეჯიბრში საქართველოს სახელით 14 სპორტსმენი იღებდა მონაწილეობას, სხვადასხვა დისციპლინაში - აუცილებელი პროგრამით, სოლო პროგრამით, წყვილთა შორის და ჯგუფური გამოსვლით. საერთო ჯამში, ქართველმა სპორტსმენებმა 23 მედალი მოიპოვეს: 15 ოქრო, 11 ვერცხლი, 7 ბრინჯაო.