მთავრობის კანცელარიასთან, სადაც ლგბტ აქტივისტები აქციის გამართვას აპირებდნენ, ლევან ვასაძე თავის მხარდამჭერებთან მივიდა და განაცხადა, რომ საქართველოში „გეი პრაიდი“ არ ჩატარდება

მთავრობის კანცელარიასთან, სადაც ლგბტ აქტივისტები აქციის გამართვას აპირებდნენ, სამართალდამცველებმა ცოტა ხნის წინ ლგბტ აქტივისტი და აქციის ორგანიზატორი გიორგი თაბაგარი მიმდებარე ტერიტორიიდან გაიყვანეს.

როგორც ლგბტ აქტივისტებმა განაცხადეს, ისინი დღეს მთავრობის ადმინისტრაციასთან მშვიდობიანი აქციის გამართვას აპირებდნენ, რის უფლებასაც მათ ასევე კანცელარიასთან მყოფი კონტრაქციის მონაწილეები არ აძლევენ.

გიორგი თაბაგარის დაკავებას წინ უძღოდა ბიზნესმენ ლევან ვასაძის განცხადება.

როგორც მან კანცელარიასთან თავის მხარდამჭერებთან ერთად ჟურნალისტებს განუცხადა, საქართველოში არანაირი ლგბტ აქცია და „გეი პრაიდი“ არ ჩატარდება.

მისივე განმარტებით, უკვე ხვალისთვის დააანონსებენ მოძრაობას და გადაწყვეტენ, როგორ უნდა გაუწიონ წინააღმდეგობა „ლგბტ პრაიდის“ ჩატარებას თბილისში.

ამ დროისთვის კანცელარიასთან მობილიზებულია პოლიცია.