მოხარული ვარ, რომ ახალგაზრდები ასე არიან ჩართულები ქვეყნისთვის ისტორიული რეფორმის განხილვაში და მათ სწორად აქვთ გააზრებული რეფორმის მნიშვნელობა,- ამის შესახებ „საპენსიო სააგენტოს“ დირექტორმა, ლევან სურგულაძემ „ინტერპრესნიუსს“ საქართველოს არაფორმალური განათლების ინსტიტუტის მიერ ორგანიზებული, პოლიტიკისა და დიპლომატიის ახალგაზრდული სამიტის დასრულების შემდეგ განუცხადა.

როგორც ლევან სურგულაძე აცხადებს, სასიხარულოა, რომ ახალგაზრდებმა მოდელირებული პარლამენტის ფორმატში , საპენსიო რეფორმა განიხილეს და ასე არიან დაინტერესებულნი ქვეყნისთვის უმნიშვნელოვანესი რეფორმით.

"მე სასიამოვნოდ ვიყავი განცვიფრებული, როდესაც ახალგაზრდებისგან მოვისმინე საპენსიო რეფორმასთან დაკავშირებული საკითხების სიღრმისეული განხილვა. მოხარული ვარ, რომ ახალგაზრდები ასე არიან ჩართულები ქვეყნისთვის ისტორიული რეფორმის განხილვაში და მათ სწორად აქვთ გააზრებული რეფორმის მნიშვნელობა",-განაცხადა ლევან სურგულაძემ.

როგორც "ინტერპრესნიუსს" ღონისძიების ორგანიზატორი ორგანიზაციის, "საქართველოს არაფორმალური განათლების ინსტიტუტის" დირექტორმა, ბაჩო ხუროშვილმა, განუცხადა, სამიტზე განხილულ ქვეყნისთვის 6 უმნიშვნელოვანეს თემას შორის საპენსიო რეფორმაც შედიოდა და „საპენსიო სააგენტოს“ წარმომადგენლების დასწრებამ ღონისძების მონაწილეებს მეტი სტიმული მისცა.

„მეტად მნიშვნელოვანია, რომ ქართველ ახალგაზრდებს ჰქონდეთ ინფორმაცია ისეთ მნიშვნელოვან საკითხებზე, როგორიცაა საპენსიო რეფორმა, გამოთქვან თავისი აზრი და ზოგადად ჩართულნი იყვნენ არაფორმალური განათლების ხელშეწყობაში. რა თქმა უნდა ახალგაზრდებისთვის წამახალისებელია ის ფაქტი, რომ უშუალოდ საპენსიო სააგენტოს წარმომადგენლები დაესწრნენ ამ ღონისძიებას. ახალგაზრდები ამ პროცესში ხვდებიან იმას, რომ მმართველი პირები არიან ახალგაზრდებით დაინტერესებულნი და თანადგომას უცხადებენ მათ“, -განაცხადა ბაჩო ხუროშვილმა.

ცნობისთვის, 15-16 და 17 ივნისს თბილისი მასპინძლობს ღონისძიებას "პოლიტიკისა და დიპლომატიის ახალგაზრდული სამიტი 2019", რომელშიც როგორც თბილისიდან, ასევე რეგიონებიდან 300-მდე დელეგატი მონაწილეობს.