რეგიონული განვითარებისა და ინფრასტრუქტურის მინისტრის მოადგილემ მზია გიორგობიანმა, ფინანსთა მინისტრის მოადგილემ გიორგი კაკაურიძემ და სამხრეთ კავკასიაში გერმანიის საერთაშორისო თანამშრომლობის საზოგადოების (GIZ) ადგილობრივი თვითმმართველობის განვითარების პროგრამის დირექტორმა კარსტენ პოსემ ერთობლივ დოკუმენტს მოაწერეს ხელი.

როგორც „ინტერპრესნიუსს“ რეგიონული განვითარებისა და ინფრასტრუქტურის სამინისტროდან აცნობეს, დოკუმენტში ასახულია სამომავლო პროგრამის „კარგი მმართველობა სამხრეთ კავკასიაში“ შეფასების დასკვნა. დასკვნის თანახმად, პროექტი დაეფუძნება მიმდინარე რეგიონული პროგრამების გამოცდილებებსა და შედეგებს. ეს პროგრამებია - „ადგილობრივი თვითმმართველობის ხელშეწყობა“, „საჯარო ფინანსების მართვა“ და „სამართლისა და სასამართლო სისტემის რეფორმის ხელშეწყობა“.

სამინისტროს ცნობით, ტექნიკური თანამშრომლობის მოდულის ამჟამინდელი მიზანია სამხრეთ კავკასიის ცენტრალური და ადგილობრივი დონის საჯარო დაწესებულებებში მოქალაქეზე ორიენტირებული სერვისების გაუმჯობესება. ეს გულისხმობს - დეცენტრალიზაციის სტრატეგიის განხორციელების ხელშეწყობას, საკონსულტაციო საქმიანობას სხვადასხვა მიმართულებით და სხვა.

რეგიონული პროგრამის სამიზნე ჯგუფი საქართველოს, სომხეთისა და აზერბაიჯანის აგრარულ დასახლებებში მცხოვრები მოსახლეობაა.

უწყების ცნობითვე, გერმანული მხარის დაფინანსებით, სახსრების მოსალოდნელი მოცულობა 15 მილიონ 600 ათასი ევროა.