საპენსიო სააგენტოს დირექტორის მოადგილე ვაჟა ჯაფოშვილი კომპანია „ნატახტარის“ თანამშრომლებს შეხვდა.
როგორც „ინტერპრესნიუსს“ საპენსიო სააგენტოდან აცნობეს, ვაჟა ჯაფოშვილმა დასაქმებულებს დაგროვებითი საპენსიო სქემის ბენეფიტები გააცნო, ბოლო მონაცემები მიაწოდა და ოფიციალურ ვებ-გვერდზე საპენსიო ანგარიშების შემოწმების პროცედურა აუხსნა.
საპენსიო სააგენტოს ცნობით, “ნატახტარის“ თანამშრომლები, რომლებიც ჩართულნი არიან დაგროვებით საპენსიო სქემაში, საპენსიო ასაკში თანხების გატანის პირობებითა და დანაზოგების ინვესტირებით დაინტერესდნენ.
,,ამ დროისათვის სქემაში 816 ათასზე მეტი ადამიანია ჩართული. 500-მა დასაქმებულმა გასვლის განცხადება გააუქმა და სქემაში დაბრუნდა. 50 ადამიანმა კი საპენსიო ასაკს მიაღწია და დაგროვებითი საპენსიო სქემის პენსიონერი გახდა. დაგროვებითი სქემის მონაწილეებმა ხელზე გაოთხმაგებული თანხა ერთიანად გაიტანეს. მნიშვნელოვანია იცოდეს საზოგადოებამ, რომ საპენსიო ასაკამდე 5 წლით ადრე ჩართულ პირებს ერთიანად შეუძლოათ საპენსიო დანაზოგის გატანა", - განაცხადა ვაჟა ჯაფოშვილმა.