28 ივნისს, ქალაქ დილიჟანში (სომხეთის რესპუბლიკა), სომხეთის ცენტრალური ბანკის დილიჟანის ტრენინგებისა და კვლევების ცენტრში საქართველო-სომხეთის ბიზნეს-ფორუმი გაიმართება. ამის შესახებ „ინტერპრესნიუსს“ სავაჭრო-სამრეწველო პალატიდან აცნობეს.
მათი ინფორმაციით, საქართველოს მხრიდან ფორუმში მონაწილეობას მიიღებენ საქართველოს ვიცე-პრემიერი, მაია ცქიტიშვილი და ეკონომიკისა და მდგრადი განვითარების მინისტრი ნათია თურნავა. სომხეთის მხრიდან კი ვიცე-პრემიერი ტიგრან ავინიანი და ეკონომიკის მინისტრი ტიგრან ხაჩატურიანი.
ფორუმის დროს ქართულ კომპანიებს შესაძლებლობა ექნებათ, შეხვდნენ სომხური კომპანიების წარმომადგენლებს, მოიძიონ პარტნიორები და დაამყარონ ბიზნეს კავშირები შემდგომი თანამშრომლობის გასავითარებლად.
ფორუმის ორგანიზატორები არიან: საქართველოს ეკონომიკისა და მდგრადი განვითარების სამინისტრო, საქართველოს სავაჭრო-სამრეწველო პალატა, სომხეთის რესპუბლიკის ეკონომიკის სამინისტრო და სავაჭრო-სამრეწველო პალატა.
„ფორუმში მონაწილეობის მსურველებმა ქ. დილიჟანში გამგზავრებისათვის ქვემოთ მოცემული შემოთავაზებებიდან უნდა აირჩიონ ერთ-ერთი:
თბილისიდან გამგზავრება პირდაპირ ქ. დილიჟანში ავტობუსით და იმავე დღეს უკან დაბრუნება. გასვლა დილის 05:00 საათზე (თბილისსა და დილიჟანს შორის მანძილი შეადგენს დაახლოებით 192 კილომეტრს, 4 სთ; ამ ვარიანტის არჩევის შემთხვევაში, ტრანსპორტირება იქნება უზრუნველყოფილი საქართველოს სავაჭრო-სამრეწველო პალატის მიერ).
ქართული კომპანიებისთვის დილიჟანში ჩასვლა ერევნიდან და უკან ერევანში დაბრუნება უზრუნველყოფილი იქნება სომხური მხარის მიერ (ერევანსა და დილიჟანს შორის მანძილი შეადგენს დაახლოებით 95 კილომეტრს, 1 სთ 30 წუთი). შენიშვნა: ამ ვარიანტის არჩევის შემთხვევაში, თბილისიდან ერევანში მგზავრობის ხარჯებს დაფარავენ კომპანიები.
დამოუკიდებლად გამგზავრება,“ - ნათქვამია სავაჭრო-სამრეწველო პალატის ინფორმაციაში.