დღეს, როგორი პროტოკოლური გაუგებრობაც არ უნდა ყოფილიყო, გავრილოვის ჯდომა პარლამენტის თავმჯდომარის სავარძელში იყო უმძიმესი სანახავი, - ასე ეხმაურება საპარლამენტო უმრავლესობის წევრი დავით მათიკაშვილი რუსი დეპუტატის, სერგეი გავრილოვის ვიზიტს საქართველოში.

„მიუხედავად იმისა, რომ მართლმადიდებლობის ნიღაბქვეშ შემოიპარა საქართველოში, გავრილოვი ისევე "იზიარებს“ მართლმადიდებლურ და ქრისტიანულ ღირებულებებს, როგორც ტოტლებენი და როდიონოვი იზიარებდნენ, ჩვენს ქვეყანას რომ აოხრებდნენ და აწიოკებდნენ. ეს ყველაფერი და ბევრად მწვავედ სახეში მიახალა პარლამენტის თავმჯდომარემ გავრილოვს, გუშინ. დღეს კი, როგორი პროტოკოლური გაუგებრობაც არ უნდა ყოფილიყო, გავრილოვის ჯდომა პარლამენტის თავმჯდომარის სავარძელში იყო უმძიმესი სანახავი, ხოლო მისი ყოფნა პარლამენტის შენობაში და ამ ფორუმისთვის პარლამენტის სხდომათა დარბაზის გამოყენება - შეცდომა. ირაკლი კობახიძე, რომელიც არ იმყოფება საქართველოში პირველთაგანია ვინც სხდომის შეწყვეტა მოითხოვა და დაგმო ეს ქმედება“,- განაცხადა მათიკაშვილმა.

ინფორმაციას პარლამენტის პრესცენტრი ავრცელებს.