მინდა მივმართო კონკრეტულ პოლიტიკოსებს, თუ ამ ადამიანებს აქვთ რაიმე მორალური პრინციპი, ბოდიში მოუხადონ „თბილსერვისს“ და აქ მომუშავე ადამიანებს“, - ასე გამოეხმაურა თბილისის მერი კახა კალაძე, პარტია „ევროპული საქართველოს“ ლიდერების ბრალდებას, რომლის თანახმადაც, თბილისის მერიის შესაბამისმა სამსახურებმა, პარლამენტის შენობის წინ, სცენის კონსტრუქცია, ხმის გამაძლიერებელი აპარატურა და ჯებირები მოიპარეს.
კახა კალაძის განცხადებით, აღნიშნული სიმართლეს არ შეესაბამება და ოპოზიციის ბრალდებებს უპასუხისმგებლოსა და უტიფარს უწოდებს. დედაქალაქის მერი იმ მიზეზებს განმარტავს, რის გამოც, პარლამენტის შენობიდან სცენის კონსტრუქციის გატანა მოხდა.
“უპასუხოდ ვერ დავტოვებდი ამ უტიფარ და უპასუხისმგებლო განცხადებებს, კონკრეტული პოლიტიკოსებისგან. ისინი ცდილობენ სახელი შეულახონ დედაქალაქის მერიას და რა თქმა უნდა, ეს ჩვენი პასუხის გარეშე არ დარჩება, რადგან არ გვინდა საზოგადოება შეცდომაში შეიყვანონ. რაც შეეხება დასუფთავების სამსახურს, ის ასრულებს თავის უფლება-მოვალეობას და ეს ადამიანები ყოვედღიურად მუშაობენ განსაკუთრებულ რეჟიმში, რის გამოც, თითოეულ მათგანს მინდა მადლობა გადავუხადო. ესენი არიან ადამიანები, რომლებიც ემსახურებიან ჩვენს ქალაქს და დედაქალაქის მოსახლეობას. ეს ადამიანები ასრულებდნენ დასუფთავების სამუშაოებს და დღეს, დილის საათებში, იქ არსებული ტერიტორია დაასუფთავეს და რადგან იქ არავინ არ იყო, არც ერთი პასუხისმგებელი პირი, რომელი იტყოდა ეს არის ჩვენი და გვჭირდება. შესაბამისად, მოხდა ამის დასუფთავება და როგორც კი მას გამოუჩნდა პატრონი, ადამიანები, ვინც მოითხოვეს, დაუბრუნდა.
ასევე მოვისმინეთ ბრალდება, რომ თითქოს დედაქალაქის მერიამ მოიპარა ხმის გამაძლიერებელი აპარატურა, ჯებირები, რაც არის ძალიან დიდი ტყუილი და მინდა მივმართო კონკრეტულ პოლიტიკოსებს, თუ ამ ადამიანებს აქვთ რაიმე მორალური, ბოდიში მოუხადონ „თბილსერვისს“ და აქ მომუშავე ადამიანებს“, - განაცხადა კახა კალაძემ.