რთულია „ნაციონალური მოძრაობის“ პროვოკაციებზე არწამოგება, - ამის შესახებ დეპუტატმა აკაკი ზოიძემ პარლამენტის ბიუროს სხდომაზე განაცხადა.

დეპუტატ ნიკა მელიას დაპატიმრებაზე პარლამენტის მიერ პროკურატურისთვის თანხმობის მიცემასთან დაკავშირებით პარლამენტის ბიუროს საგანგებო სხდომაზე აკაკი ზოიძე და მიხეილ ყაველაშვილი რომან გოცირიძეს დაუპირისპირდნენ. ზოიძემ ემოციური საქციელისთვის კოლეგებსა და საზოგადოებას ბოდიში მოუხადა.

„მინდა, თქვენ, კოლეგებს მოგიხადოთ ბოდიში და საზოგადოებას, ვინც ადევნებთ სხდომას თვალყურს, შეუფერებელი ემოციური საქციელისთვის. რთულია „ნაციონალური მოძრაობის“ პროვოკაციებზე არწამოგება, თუმცა პარლამენტის წევრებს არ გვეგება ასეთ პროვოკაციებზე აყოლა“, - განაცხადა ზოიძემ.

მისივე თქმით, 20 მაისის ღამეს მომხდართან დაკავშირებით ყველამ უნდა აგოს პასუხი, თუმცა არ უნდა გაგრძელდეს პრეცედენტი, რომ გადაწყვეტილებებს „შტამპი დაედოს“.

„რაც შეეხება თემას, ძალიან მძიმე გადაწყვეტილება უნდა მივიღოთ, მაგრამ ძალიან მძიმეა ბრალდება, რადგან როდესაც ჩვენ ვსაუბრობთ, რომ ყველამ უნდა აგოს პასუხი, აქ საუბარია კონკრეტულ პასუხისმგებლობაზე იმ მოვლენებთან დაკავშირებით, რომლის შედეგადაც ათობით დასახიჩრებული და დაზიანებული ახალგაზრდა, სამართალდამცავი გვყავდა და საერთოდ, საფრთხე მიადგა ამ ქვეყნის კონსტიტუციურ განვითარებას. ჩვენ ყველა ამაზე ვიმსჯელებთ, ძალიან მნიშვნელოვანია ეს და მნიშვნელოვანია ასევე, რომ არ შევქმნათ არასასურველი პრეცედენტი, როგორც ადრე იყო, პირდაპირ შტამპს რომ ადებდა მათი სასამართლო, მათი პარლამენტი გადაწყვეტილებებს. ჩვენი მხრიდან ამ პრეცედენტის გაგრძელება არ უნდა დავუშვათ“, - განაცხადა ზოიძემ.