„უტიფრობაზე თავი შეიკავე და ზრდილობა იქონიე,“ - ამ სიტყვებით იურიდიულ საკითხთა კომიტეტის თავმჯდომარე ანრი ოხანაშვილმა „ევროპული საქართველოს“ წევრს აკაკი ბობოხიძეს მიმართა. ის ოპოზიციონერ დეპუტატს დაემუქრა, რომ კომიტეტის სხდომას დაატოვებინებენ.

საპროცედურო საკითხთა და წესების კომიტეტის სხდომაზე ოპოზიციისა და უმრავლესობის წევრებს შორის სიტყვიერი დაპირისპირება უკვე ერთი საათია მიმდინარეობს. უმრავლესობის წევრები ოპოზიციონერ დეპუტატებს სიჩუმისკენ მოუწოდებენ. ანრი ოხანაშვილის თქმით, როდესაც კომიტეტის თავმჯდომარე საუბრობს, ოპოზიციამ კეთილი უნდა ინებოს და გაჩუმდეს.

„ერთი წუთით ახლა მოითმინეთ მართლა. კომიტეტის თავმჯდომარე როცა საუბრობს, კეთილი ინებეთ და მოისმინეთ. ვიცი, რომ არ გჩვევიათ თავშეკავება, ბატონო კაკო, მაგრამ თავი შეიკავე. ადეკვატური პასუხი იქნება, რომ უტიფრობაზე თავი შეიკავო და ზრდილობა იქონიე. ასაკის გამო გცემთ პატივს. მშვიდად იყავი, წინააღმდეგ შემთხვევაში გაბრძანდები გარეთ,“ - მიმართა ოხანაშვილმა ბობოხიძეს.

პარლამენტის ორი კომიტეტის გაერთიანებულ სხდომაზე, სადაც ნიკა მელიასთან დაკავშირებით პროკურატურის მიმართვის განხილვა მიმდინარეობს, თავად დეპუტატი ნიკა მელია არ ესწრება. საპროცედურო და იურიდიულ საკითხთა კომიტეტების გაერთიანებულ სხდომაზე დეპუტატები ნიკა მელიასთვის სადეპუტატო იმუნიტეტის შეჩერების საკითხს განიხილავენ.