რიზეს ერდოღანის სახელობის საავადმყოფოში მყოფი საქართველოს მოქალაქე, რომელიც ავარიის შედეგად დაშავდა, რეანიმაციულ განყოფილებაშია მოთავსებული. ექიმების განცხადებით, მას სახეზე ჭრილობები, დაზიანებები, მარჯვენა ბარძაყის ძვლის მოტეხილობა აღენიშნება.
მათივე ცნობით, 53 წლის ქალის ჯანმრთელობის მდგომარეობა საშუალო სიმძიმისაა.
შეგახსენებთ, რომ წუხელ, თურქეთში, ავარიის შედეგად საქართველოს ორი მოქალაქე გარდაიცვალა, ორი კი დაშავდა, ერთ-ერთმა კლინიკა უკვე დატოვა.
აჭარის ჯანდაცვის მინისტრის ზაალ მიქელაძის ინფორმაციით, ამ დროისათვის საქართველოს საკონსულოსა და თურქული მხარის დახმარებით, გარდაცვლილთა გადმოსვენების პროცედურები დაწყებულია.